Pynsaphriang ka DSBM-G ïa ka khubor halor ka jinglong kongsan ki jaka leit bar

Shibynta ban rakhe ia ka sngi kyrpang jong ka jaka leit bar lane ka World Toilet Day hynnin ka sngi u Deputy Commissioner u ba dei ruh Chairman DSBM-G- Ri Bhoi district, Nongpoh, u Abhilash Baranwal, u la plie ia ka World Toilet Day Campaign 2024 ban ialap halor ka jinglong ba kongsan jong ki jaka leit bar ba paka ban iada ia ka khuid ka suba bad ka Koit ka Khiah. Ha kane ka sngi, la ia shimbynta ha kane ka program da u Bah U Kurbah, Executive Engineer ka tnad PHE, ki nongtrei ka tnad PHE nalor ki nong ioh bhah ia ka skhim PMAY.

Haba kren pynshai halor kane ka sngi kyrpang jong ka jaka leit bar ba paka, u Bah U Kurbah u la pharia ba ia kane ka sngi la rakhe ha satlak ka pyrthei ban ialap ia ka khubor ban lait na ka jingleit bar pathar da kaba shna da ki jaka leit bar ba paka ban iada na ki jingpang jingshitom bapher bapher bad ruh ban wanrah ia ka khuid ka suba hapoh ki Shnong ki thaw.

U la iathuh ruh, ba ka thong kaba hakhmat eh ka long ruh ban wanrah ia ka jingiatreilang bad ka jingkitkhlieh kumno ban wanrah ia ka jingkhuid jingsuba ha ka mei mariang da kaba shnania ki jaka leit bar haman ki thliew iing briew bad ki jaka leit bar paidbah ha ki shnong ki thaw ne ki iew ki hat.La pyntip ruh, ba lyngba kane ka campaign kaban kut ha ka 10 tarik u Nohprah, kin don ka jingmaramot ne tei thymmai bad ka jingpynheh ia ki jaka leit bar ha ryngkat ka jingiatreilang ruh bad kiwei kiwei ki tnad treikam sorkar jylla.Ha kane ka program, la sam ruh ia ki jingmang pisa sha ki 14 ngut ki nongshong shnong kiba la ioh bhah kyrpang.