Pynshai u heh BJP ba u ieit bad burom ia riewngeit Khristan

Hadien ka jingspahriang ki video ka la mih ka jingpyrshah jur kiba bun balang bad na ka liang ka seng BJP ka la pan jingshai hynne ka sngi, u Nongialam ka BJP bad u National Secretary barim u Sunil Deodhar ula pynpaw ia ka jingsngewsih halor ka jingkren ha ka Indigenous Faith Conference ba la long ha Pynter, Pynursla, East Khasi Hills. Ha ka shithi kaba la phah sha u General Secretary ka BJP Meghalaya u Bah Wankitbok Pohshna, u Snil Deodhar ula pynpaw ba u burom bha ia u Trai Jisu Khrist bad u don ia ka jingieid ia ki riewngeit Khristan bad kam dei satia ka jingthmu ban pynsngewsih ia kino kino ki para ne hynmen kynthei bad shynrang Khristan, kumta lada ki don kino kino ki kyntien ki dei kiba la shim ba um burom ne wanrah ia ka jingsngewsih, u pynpaw ia ka jingsngewsih halor kane.

Ula pynpaw ka jingkren ha ka jingialang ka dei kaba la pynleit jingmut halor kiba dang bat ia la ka Niam Tynrai bad ka dei da ka jingthmu ban shimkhia ban pynneh pynsah ban iada bad ban kyntiew ia ki riewngeit ba bat ia ka Niam Tynrai ym ban kynthoh salonsar ia ki Khristan baroh.U Sunil ula pynpaw ba la 20 snem ula trei ha ka kynhun ka jong u “My Home India”, bad la ai jingiarap ia hajar ngut ki samla Khristan na ka thain shatei lam mihngi bad ju pynlong man la ka por ka jingrakhe lypa ia ka Khristmas na ka bynta ki samla Khristan ba sah jngai na kiba haiing ba hasem ha kylleng ka ri India bad ula pynlong ruh ia ka jingrakhe ha ka iingsah jong u Symbud Myntri Rangbah duh barim ka ri u L.K. Advani.

U la pynpaw ba ka jingkyrshan ia ki riewngeit ba dang bat ia ka Niam Tynrai kum ka Niam Khasi bad Niam Tre kam dei bym sngewtynnad ia kiwei pat ki niam.“Ban pynsaphriang ia ka hok bad ka jingioh kaba mar kumjuh ia baroh ki riewngeit kam dei satia ka jingisih ia kiwei pat. Ka jingkhlain ka ri India ka shong ha ka jingburom mar kylliang bad ka pateng ka jingimlang da ka jingsuk” ula ong bad ka pynpaw ia ka jingsngewsih ia kano kano ka jingpynmong ba khlem da thmu bad ieng skhem ha ka jingkular ban don ka jingieid kynthup ka hok ia baroh ki niam.