Pynshlur ka HID Foundationban rep shynrai khlem ber dawai

Ka HID Foundation Shillong kala jam shaphrang ha kaban pynshlur ia ki nongrep ban rep ia u shynrai khlem ka jingber dawai ne ‘Organic Turmeric’ da ka jingthmu ban pynlong ia ka jylla ba kan long kum ka nongialam ha kaban pynmih ia une u marrep bad ban kyntiew ia ka ioh ka kot jong ki nongrep.Ka HID Foundation kala pynpaw ba kala sdang ia ka Organic Turmeric Project ha u Jymmang 2023 ha Marngar-Umden Cluster, Umling C&RD Block, Ri-Bhoi District, bad ia kane la leh, da ka jingbei tyngka jong ka North Eastern Council (NEC) hapoh jong ka Ministry of Development of North Eastern Region (DoNER) bad la pyntreikam da ka Directorate of Horticulture ka sorkar Meghalaya, kane ka projek kala iaid bha shakhmat. Nalor kane kala ioh ruh ia ka jingkyrshan na ka District Horticulture Officer ka Ri-Bhoi bad lyngba kane ka sienjam kala ai jingmyntoi ia ki 100 ngut ki nongrep bad kala wanrah ia ka jingkylla na ka bynta 1,000 ngut ha ki longiing jong ki nongrep bad ki don ia ka thong ban kyntiew ia ka rukom rep bad ban kyntiew ia ka ioh ka kot ha thaiñ nongkyndong.

Ka la pyntip ruh ba ki nongrep kila ioh ia ka jingkyrshan pisa kaba pura kiba kynthup ia ki tiar bad ki jingdonkam na ka bynta ban rep, ka bio-fertilizers, ka sboh bad ka bai bylla kaba man la ka sngi kaba ailad ia ki ban pynleit jingmut bha ha ka rep shynrai. La pyndep ia kane ka rukom rep ha ka wat kaba nyngkong bad ha ka wat ka baar ka kam kala kynjoh sha ka 75%. Kane ka projek ka don ruh ia ka thong ban wad ia ki lad ki lynti ban weng ïa ki jingeh kiba la slem bha na ka jingbym don ia ki symbai shynrai bad ka pynkup bor ia ka imlang sahlang ban khie im biang na ka jingshah ktah ka ioh ka kot ka jongki na ka jingsaphriang ka khlam jingpang COVID-19.

Ka jingpynrung ia ka rukom rep khlem pyndonkam dawai, kadei da ka jingthmu ban pynthikna ban don ia ka ioh ka kot ia ki nongrep ka thaiñ bad Foundation ka pynpaw ia ka jingsngewnguh ia ka NEC bad Sorkar India kiba la ai jingkyrshan ban tei ia ka jingim ki paidbah ha thaiñ nongkyndong bad ban pynkhlain ia ka imlang sahlang jong ki nongrep. “Kane ka sienjam ka long kham palat ban ia ka rep ka riang hynrei ka long ruh na ka bynta ka jingkyrmen bad ka jingskhem jingmut” la pynkut ka HID Foundation.