Pynshlur ka Nirmala ia ki samla ban leh INTERN ha ki kam khaii

Ka Myntri Pla Tyngka ka ri ka Nirmala Sitharaman hynne ka sngi ka la pyniaid ia ka jingialang jong ka North East Roundtable hapoh jong ka Prime Minister’s Internship Scheme (PMIS) ia kaba la wan ban iashim bynta da ki samla ba leh ‘Intern’ ne ioh jinghikai pyntbit ha ka kam na kylleng ki jylla jong ka thain shatei lammihngi jong ka Ri. Ha katei ka jingialang la iadonlang u Myntri Rangbah ka jylla u Conrad K. Sangma, ka Myntri ka koit ka khiah ka Kong Ampareen Lyngdoh, u Chief Secretary ka jylla u Bah D.P Wahlang bad ka Secretary jong ka Ministry of Corporate Affairs ka Deepti Gaur Mukerjee, ki samla kiba don hapdeng ka jingioh jinghikai, ki nongmihkhmat jong ki karkhana bad ki heh ophisar na ki tnad sorkar bapher bapher. Ki samla kiba leh Intern ki la pynpaw ia ka jingiaid lynti ka jong ki, ka jingangnud bad kumno kane ka prokram kala wanrah ia ka jingkylla.

U Khlainkupar Lyngkhoi uba leh ia ka ‘Intern’ ha ka REC Limited, ula ong ka PMIS ka la pynlong ia u ban long uba skhem jingmut ha lade bad ka jinghikai kaba ula ioh kan iarap shibun ia u ha ka ban noh synniang ha ka jaka trei bad kawei na ki sap kaba kongsan kaba ula ioh kadei ka jingbynta ia ka por. Ula pynpaw ka jingsngewnguh ia u Myntri Rangbahduh ka ri u Narendra Modi bad ia ka Myntri ka Sorkar Pdeng kaba khmih ia ka Pla Tyngka ka Nirmala Sitharaman halor ka jingailad ia ki samla kiba wan na ki jaka kiba na kyndong ban ioh ia ka jingmyntoi lyngba katei ka scheme.

“Ka thong kaba hakhmat eh jong ka PMIS bad ka jingiohi jngai jong u Myntri Rangbahduh ka ri halor kane ka sienjam ka long ban kyrshan ia kito ki bym pat ju ioh ia ka jingbthah kam ne Assignment ne ka kam, kito kiba donkam ban ioh ia ka jingtbit bad ia ka lad ban pyni ia la ka jingshemphang. Kane ka prokram kadei ban iarap ia phi ban leit sha ka kompani kaba bha tam, ban pynshemphang ialade bad ka rukom trei ia ka kam bad ban ioh ia ka kabu kaba biang tam ban ioh ia ka kam ha ka jingim. Nga dap da ka jingkmen ban iohi ia phi baroh ba phin mih bad ban pyndonkam pura ia ka kabu kaba phi ioh” la ong ka Myntri Pla Tyngka haba kren ha ka jingialang. Ka Myntri Pla Tyngka ka la pynshlur ruh ia ki samla kiba leh Intern ban sdang ia la ki kam khaii pateng bad ka la pynthikna ba ka Ministry kan btin lynti bad kan ai ruh ia ka jingkyrshan ba pura.