U Lamphang ka Iingdorbar Thawain ka Jylla u Thomas A. Sangma hynne ka sngi ula lum ia ka jingialang ha Assembly Secretariat, Khyndailad ban khmih bniah ia ka jingiaid shakhmat ki kam ka jingtei ia ka Iingdorbar ba thymmai ha Mawdiangdiang. Ha ka jingialang la iashim bynta da u Myntri Rangbah ka Jylla u Conrad K. Sangma, ki Symbud Myntri Rangbah ka jylla kynthup u Bah Prestone Tynsong bad u Bah Sniawbhalang Dhar, u Chief Secretary ka jylla u Bah D.P. Wahlang, ki ophisar ka jylla, ki heh ophisar Meghalaya Legislative Assembly Secretariat bad kiwei kiwei. Haba iakren bad ki nongthoh khubor u Thomas A. Sangma ula ong, ba kane ka jingialang ka long ban khmih ia ka jingiaid shakhmat ki kam bad ki la shim ia ki sienjam ban pynthikna ba dei ban pyndep ha ka por kaba la buh bad ban pynthikna ban pynneh ia ka kyrdan ha ka rukom trei bad kin ym lah ban pdiang ia ka kam kaba la shut rei kyrkieh.
U Lamphang ula ong ruh ba ka iingdorbar bathymmai kam dei satia ka jingtei kaba la shu shna da kumne kumtai hynrei ka kynthup ruh ia ki bynta kum ka Security, Audio-Visual, Acoustics, Interiors bad Carpeting. Kumta kim lah ban shaniah tang ha uwei u kontraktor ban pyntrei ia katei ka kam baroh hynrei kila don bun ki kontraktor kiba la shim ia kam kidei ban don ia ka jingiatreilang bad jingiasngewthuh jingmut. Ha kaba iadei bad ka jingbuh por, u Lamphang ula ong ba ki lah iaid ha ka lynti hynrei katto katne ki jingeh ki lah ban mih bad ki lah phikir bha khamtam ha kaba iadei eh bad ka Security bad Acoustic namar ha ka jingjaw slap kala pyni ba kala don ka jingsawa ha ka tnum bad kumta ki iengskhem ban pynbeit noh mardor ia kane.
U Lamphang ula ong ba ki lah kyrpad ba ia ki nongtrei dei ban pyntrei noh ha ki 3 tylli ki wat ne ‘Shift’ ban pynkloi ia ka kam khlem da iapein pat ia ka jinglong jingman jong ka kyrdan kaba dei ban leh. Halor ka jinglut jingsep ka jingtei ia ka iingdorbar ba thymmai, u Lamphang ula ong,“Ia mynta, ngim pat pynkylla eiei na ka bhah tyngka kaba la dep ban mang. Watla ym lah ban kiar ba ka lah ban don shuh ka jingpynlut, hynrei ngi dang ialeh beit ban don hapoh jong ka jingbuh dor kumba ba la mang naduh ka por kaba sdang”.