Pyntip ka tnat pulit ban sdang thymmaiia ka PET naduh 13 tarik Nohprah

Ka Central Recruitment Board ka Meghalaya Police hynne ka sngi ka la pyntip ba kan sdang thymmai ia ka Physical Efficiency Test (PET) naduh ka 13 tarik u Nohprah haduh ka 15 tarik u Rymphang 2025. U Chairman ka CRB ka Meghalaya Police bad u Inspector General of Police u Dalton P Marak ula pyntip ha ka 7 tarik u Naiwieng la pynsangeh noh mardor ia ka PET, namar ka don ka jingthud ki kor ki bor ha ka por pynlong ha 1st MLP Bn, Mawiong bad 4th MLP Bn, Sohpian bad mynta yn pynlong noh da kaba thymmai ia ka PET ia baroh ki thep kam pulit. U la pyntip ki tarik ba la pynbeit thymmai ia ka PET yn pynlong naduh 13 haduh 20 tarik Nohprah 2024 ha ka 3rd MLP Bn, Sahbsein, Jowai. Katba ha ka 6 haduh 11 tarik Kyllalyngkot, 2025 ha 5th MLP Bn, Samanda, Williamnagar bad ha 4th MLP Bn, Sohpian, Nongstoin. Katba ha ka 13 tarik Kyllalyngkot haduh 15 tarik u Rymphang 2025 yn pynlong ha ka 1st MLP Bn, Mawiong, Shillong bad ha ka 2nd MLP Bn, Goeragre, Tura.

U Chairman ka CRB u la kyntu ia baroh ki ban ialeh ia ka PET ha ka 3rd MLP Bn, Sahbsein, Jowai, ba ki dei ban Download ia ki Admit Card na ka Meghalaya Police website ia kaba yn lah ban ioh naduh ka 6 tarik u Nohprah 2024. U la pyntip ia ki Admit Card kiwei pat ki kyrtong ban leh ia ka PET ha kiwei pat ki jaka, kin lah ban Download naduh ka 16 tarik Nohprah, 2024.  U Chairman ka CRB ula kyntu ia ki kyrtong ba kin pynthikna ia ki jingtip ha shwa ban Download ia ki Admit Card bad kan don ruh ka lad ba ki lah ban pynkylla/pynbeit ia ki jingtip shwa ban pynmih ia ka Admit Card bad ki kyrtong kiba kwah ban bujli ia ka tarik ban iashim bynta ha ka PET, ki dei ban phah da ka aplikeshon sha u Member Secretary, Central Recruitment Board shwa ban sdang ka PET.

Ka CRB ka la bthah ia ki kyrtong ban kin khmih man la ka por ia ka Official Meghalaya Police Website na ka bynta ki jingtip ba donkam bad lada ki kwah ia kino kino ki jingtip ki lah ban leit sha ka ophis ka Central Recruitment Board ha Mawroh, Shillong ne phone ha u Helpline no.6033164273 ha ki sngi long trei.