Napdeng baroh ki sengsain pyrthei ha Jylla, dei tang ka Voice of the People’s Party (VPP) kaba don ha Liang pyrshah kaba la phah ktien sha ka Sorkar Jylla ba kan ym shim bynta ha ka All Party Committee halor ka lynti Rel.
Haba pyrshang ban wad jingtip ban pynthikna halor kane, na ka liang u Chief Secretary (CS) ka Jylla u Bah DP Wahlang ula ong, ka Sorkar ka la ioh pdiang tang kawei na shithi na ka kawei ka sengsain pyrthei riewlum (Regional Party) ban pyntip ba kan ym shim bynta ha ka All Party Committee ban iathir halor ka lynti Rel.
U Bah DP Wahlang ula ïathuh ba ka Sorkar ka la pynbna paidbah ia ka All Party Committee on Railway bad shen ka Sorkar kan sa lum jingïalang ban iathir halor ka lynti rel. Lah ban kdew ha ka 2 tariik Iaiong 2025, ka Sorkar Jylla ka la thaw ia ka All Party Committee on Railway bad ïa kane ka Committee yn khlieh hi da u Myntri Rangbah ka Jylla.