Pyntip sha ki pulit lada don kiba lum pisa be-ain, ong u bah Prestone

U Symbud Myntri Rangbah ba peit ia kam pohiing u Bah Prestone Tynsong ula kyntu ia ki nongkhaii ba ki dei ban pyntip sha ki pulit lada ki kynhun sengbhalang ba wan lum pisa be-ain. Ia kane ula kren hadien ka jingsaphriang ki risit dawa pisa ki sengbhalang ha ki lad pathai khubor ba ioh na ki nongkhaii ha Iewduh kynthup ka Hynniewtrep National Youth Front (HNYF), Hynniewtrep National Youth Movement (HNYM), Poor Peoples’ Movement (PPL), Hynniewtrep Achik National Movement (HANM), Ki Khlur u Hynniewtrep (KUP), Hynniewtrep North Federation (HNF), Hynniewtrep People Define Alliance (HPDA), Hynniewtrep Khasi People Movement (HKPM), Hynniewtrep People Youth Organisation (HPYO), Hynniewtrep National Youth Council (HNYC), Hynniewtrep Youth Federation (HYF) bad ka United Khasi Council (UKC).

Haba iakren bad ki nongpathai khubor u Bah Prestone ula ong, ka Sorkar Jylla kan leh da kaba tyngeh ia ki kynhun Sengbhalang kiba lum ne dawa pisa be-ain na ki nongkhaii bad ula iathuh, ba ula dep bthah ia ki bor District kynthup ia u Superintendent of Police ba kin leit iakren ia ki nongkhaii kiba don hapoh Iewduh bad ha kylleng ki jaka ba kidei ban pyntip sha ki pulit lada don kano kano ka jingshah dawa pisa khnang ba ki pulit kin ioh ban leh ia kaba donkam.

“Lada ki don ka jingsngew sheptieng halor ka jingdawa ban noh synniang lane ka jingpynbor ban siew ia ka pisa, ki nongkhaii ne nongshong dukan kim dei ban artatien ban pyntip sha ki pulit ha kano kano ka por” ong u Bah Prestone bad ka kyntu ia ki nongkhaii bad nongshong dukan ba kim dei ban artatien bad ki lah ban phone ha u Emergency Number ban pyntip ha kano kano ka por bad ki pulit kin sa shimkhia mardor ia ka kam.