Pyntreikam noh ïa ka Entry Exit Point bad ka MRSSA Act

Ki Nongialam ka  Ri Bhoi Youth Federation (RBYF) Sengkmie hynnin ka sngi ki la leit ban kynduh ïa u Deputy Commissioner ka Ri Bhoi u Abhilash Baranwal ban ïa kren halor artylli ki mat ba donkam ban pyntreikam hapoh ka dong bad ka thaiñ Ri Bhoi, kata ka kynthup ïa ka jingpyntreikam noh ia ka aiñ Meghalaya Residents Safety Security Act (MRSSA) – 2016 ha Ri Bhoi District bad kawei pat ka dei halor ka jingpyntreikam ia ka skhim Saubhagya kaba dei ka skhim ba la buh thong ban pynpoi bording ilektrik ha man ki longïing. Ha katei ka jingleit ban kynduh ïa u Deputy Commissioner ka Ribhoi la lam khmat da u President Rangbah ka Seng u Bah Bipul Thankhiew ha ka jingiadonlang u Adviser ka Seng u Bah Augustien Sten lem bad kiwei ki nongialam bad ki dkhot ka RBYF Sengkmie.

Haba kren sha ki lad pathai khubor, U President ka RBYF u bah Bipul Thangkhiew u la ai khublei ia u DC ka Ri Bhoi ba u la sdang ban pyntreikam ïaka Aiñ MRSSA hapoh Ribhoi lyngba ka District Task Force Committee bad ban aibor ruh ïaki Bor pynïaid Shnong ban peit pyrman ïaki Nongsong wai, hynrei ka Seng ka Buh pat ïaka jingkylli sha ka sorkar ba balei ym lah ban pyntreikam noh ïaka Entry Exit point kaba na ka liang ka sorkar ka la dep ban pynlut iaka pisa ban tei ïa ka nanduh ka 3 tarik u October 2016 hynrei haduh mynta ym shym la lah pat ban pyntreikam pura kumba la thmu. U Bah Bipul Thankhiew u la ong ba ka Seng ka buh jingkylli ruh ia ka sorkar jylla halor ka jingpyntreikam ia ka skhim Saubhagya namar katkum ka jingïohi ha ki ladpathai khubor ba ka sorkar lyngba ka kynhun ki Minister ka la pynduh noh ia kane ka skhim ha ka 12 tarik September 2025 ba kum ka seng kam sngew iahap namar lada peit ia ka jingpynshai u Myntri rangbah ba ha Ri Bhoi ki don sa tang 17 tylli ki shnong ha Ri Bhoi kiba ym pat poi bording ilektrik.

Ula ong katkum ka jingtip ka seng na ki 600 tylli ki shnong ha Ri Bhoi kiba pyntreikam ia ka skhim Saubhagya ka dei tang ha ki thain ka Eastern Ri Bhoi lem bad katto katne tylli ki Shnong hynrei kiba bun kim pat pyntreikam ia ka skim sam bor dieng hynrei na ka liang ka Sorkar ka la pynduh ia kane ka skim bad la thmu pat ban pyntreikam sa ia kata ka skhim RDSS ban bujli ha ka jaka jong ka skhim Saubhagya.