Pyrkhing ka KHADC ban ai Trading License thymmai ia ki bar jylla

U Chief Executive Member (CEM) ka Khasi Hills Autonomous District Council (KHADC) u Bah Winston Tony Lyngdoh ula ong, ka District Council ka la pyrkhing ban ai Trading License, khamtam ha nongbah Shillong ha kaba yn ai Trading License thymmai tang ha ki jaka ki bym don ki nongshong shnong ki jaidbynriew Khasi.Haba kynthoh ia ki khubor ba pynpaw ba ka District Council ka la ai Trading License ia ki bym dei riewlum ban pyniaid ia ki dukan Electronic ha Them Mawbah, u CEM u la ong ba la ai tang kawei ka Trading License thymmai ha katei ka thain bad kam ba ym don nongshong shnong ka jaidbynriew Khasi ha katei ka thain.

U CEM u la ong ba lada ki trai ri trai muluk ki wan shakhmat ban plie dukan ha Them Mawbah, ka District Council kan weng noh mardor ia ka Trading License ba la ai sha u bym dei riewlum (Non-Tribal) uba pyniaid ia ka dukan electronic.Ula bynrap ruh ba une u nongkhaïi bym dei riewlum la kha bad pynsan pynrangbah hangtei bad ula shong la sah hangtei da ki phew snem bad ia ka Trading License la ai hadien ka jingbishar bniah ïa baroh ki kot ki sla khamtam hadien ba u la ioh ia ka No Objection Certificate (NOC) na ka Dorbar Shnong.“Ngim ju ai ia ki Trading License khlem da pynshisha bha. La bthah ia ki nongtrei bad ki ophisar jong ka Council ban pynshisha ia ki jaka na kaba ki pdiang ia ki aplikeshon shwa ban ai ia kano kano ka License” ula ong.

“Ka District Council ka pyrkhing bad husiar haba ai Trading License ha kiwei pat ki jaka” u la bynrap.“Ym ju ai laisen khlem ka jingpynshisha kaba bniah ne khlem da phah ïa ki nongtrei na ka tnat Trade ban bishar bniah ïa ka jinglah ban leh ïa ka khaii pateng bad ka jinglong jong ka kam kaba don bynta” la ong u CEM da kaba pynksan ba la ju ai jingmyntoi ïa ki trai ri trai muluk lada ki lah ban leh ïa kano kano ka kam khaii pateng.“Wat hadien ba la pynshlur ia ki briew trai ri ban shim ia kum kine ki kam khaii, lada ym don ba wan shakhmat, ngi pyrkhat ban ai Trading License ia ki bym dei ki riewlum” u la ong.