Pyrshah ka KSU ban pynlong ‘Public Hearing’ ia ka Cement Plant ha Daistong

Ka Khasi Student Union (KSU) ka la iakynduh ïa u Member Secretary ka Meghalaya State Pollution Control Board (MSPCB) u Dr GH Chyrmang bad dawa ban sangeh ia ka ‘Public Hearing’ na ka bynta ka Shree Cement Integrated Cement Plant ha Daistong, East Jaintia Hills.Lah ban kdew ka tarik la buh ha ka 19 tarik mynta u bnai ban pynlong ia ka Public Hearing ha Daistong, East Jaintia Hills.Haba kren sha ki lad pathai khubor u General Secretary ka KSU East Jaintia Hills, u samla KS Suchiang ula ong, ba ka seng ka don bun ki jingdawa ban pyrshah ia ka ‘Public Hearing’ hynrei kaba sngewkhia jur ka long namar ka jingpynkhein ia ka ain Meghalaya Land Transfer Act, 1972.

U Samla Suchiang ula kynnoh ba uwei u trai Jylla u la die beain ia ka jaka sha u riew shimet bym dei trai Jylla kaba long beain katkum ka Meghalaya Land Transfer Act, 1972.Ula ïathuh ha ka jingiakynduh ïa u Member Secretary, ka KSU ka la buh ha khmat eh ia ka jingkylli, kumno ka MSPCB ka lah ban pynlong ia ka ‘Public Hearing’ namar haduh mynta kam lah ban pynbeit ia ka jingiadie khyndew beain.“Ka jingkylli ka mih, hato u bar Jylla u lah seh ban thied jaka na u trai Jylla. Kane ka long beain katkum ka Meghalaya Land Transfer Act, 1972” la kynnoh u Samla Suchiang.

U Nongialam ka KSU ula kynnoh ba kane ka jingioh thied jaka u bar Jylla kam buh jingeh tang ia ka shnong Daistong ne ia ka thaiñ East Jaintia Hills, hynrei ka buh jingma ia ka Jylla Meghalaya baroh kawei. “Kane ka pyni ba ka Sorkar ka ai lad ia ki briew ban leh Benami ban die jaka sha ki bar Jylla” u la kynnoh.“Ka sorkar hi kaba shna ia ka ain bad mynta ka paw ba ka Sorkar hi ka pynkheiñ ia ka ain Meghalaya Land Transfer Act, 1972” u la bynrap.Ula ïathuh ba 80% haduh 90% ki paidbah nongshong shnong Daistong ki dei ki nongrep bad ka jingtei ia ka Shree Cement Integrated Cement Plant kan ktah ia ki nongrep ha ka thain.