Pyrshah ka Synjuk 7 shnong ban pyntrei ia ka Project Eco Tourism ha Wildlife Nongkhyllem

Ki nongshong shnong ba kynthup 7 tylli ki shnong sawdong ka Nongkhyllem Wildlife Sanctuary Ri-bhoi District, ki la pynpaw ka jingpyrshah ia ka Eco Tourism Infrastructural Project ban pyntrei ha khlaw Nongkhyllem Wildlife Sanctuary, Ri Bhoi District. Ia kane la pynsngew da u General Secretary ki 7 shnong hapoh ka Raid Sohkhwai u Bah Shanbor Rani.  Shuwa kane ka Synjuk ki 7 shnong ka Raid Sohkhwai ka la lum jingialang bad ka Greentech Foundation ba lamkhmat ban pyrshah ia ka jingthmu ka Sorkar lyngba ka tnat Tourism ban pyntrei ia ki project bapher hapoh Nongkhyllem Wildlife Sanctuary, Ri-Bhoi District. Ka Sorkar lyngba ka tnat Tourism ka la aiti sha ka Company E factor Experiences Limited ban pyntrei ia ki project hapoh ka Nongkhyllem Wildlife Sanctuary kynthup ki Hotel ne Resort, Skywalk, Water Sport Arena bad kiwei ki Project ha ka jinglut ym duna T.26.30 klur.  Haba kren sha ki lad pathai khubor u Bah Shanbor Rani ula ong, ki nongshong shnong sawdong ka Wildlife Sanctuary, kim pyrshah ia ki kam pynroi ka Sorkar ka thmu hynrei ka jingpyrshah ka dei ba ka Sorkar ka mut wanrah ia ki Project hapdeng ka Nongkhyllem Wildlife Sanctuary. U la bynrap ka jingpyntrei bun tylli ki project hapoh ka khlaw kan pyndik ia ki mrad, ki sim, ki doh ba don hapoh kane ka Wildlife Sanctuary. “Ngi sngew kyndit ba ka Sorkar ka mut wanrah ia ki Project hapoh khlaw Nongkhyllem Wildlife Sanctuary. Balei ka Sorkar kam wanrah ia kine ki juh ki project ha kiwei ki jaka ne ki shnong ba marjan kane ka Sanctuary” la ong u Bah Shanbor.

U la ong ka jingdon jong kane ka khlaw ym tang ka ai jaka sah ia ki mrad hynrei ka ai shibun ka lyer khuid ban ring mynsiem ia ki nongshong shnong ka thain khamtam namar ka Byrnihat ka dei ka jaka ba jaboh tam. U General Secretary ka Synjuk ki 7 shnong ka Raid Sohkhwai ula ai jingmut ia ka Sorkar ha ka jaka ban pyntrei ia ka Eco Tourism Infrastructural Project hapoh khlaw ka dei ban ker kynroh sawdong ia ka Nongkhyllem Wildlife Sanctuary ban iada na ka jingwan kiew ki mrad sha ki shnong bad kumjuh ban iada na ka jingleit kyntur pud ki briew sha ka Wildlife Sanctuary. “Ha ki sngi ban wan ngin leit kynduh ia ki bor ba halor kynthup ki Myntri ba dei peit ban iakren bad ban iatai sani bha haba ia dei bad ka Project Eco Tourism hapoh ka Nongkhyllem Wildlife Sanctuary” u la ong.  Na ka liang u Chairman ka Greentech Foundation u Bah HB Nongrang ula ong, ka Foundation ka khlem wan sha Nongkhyllem ban pynbor ia ki paidbah ban pyrshah Eco Tourism Infrastructural Project,  hynrei ka jingwan jong ki ka dei tang ban iaphylliew jingmut halor ka jingshah ktah lada pyntrei ia ki project bapher hapoh ka Wildlife Sanctuary.

Ula iathuh ka sur ba mih na ka jingialang hapdeng ki Rangbah Shnong bad Sordar jong ki 7 ki shnong ka long ban ym pdiang ia ka Project Eco Tourism. U la ong na ka Sorkar ka dei ban ai sha ki nongshong shnong ban pyntrei ia ka Project Eco Tourism, khnang ban iarap ia ki paidbah ha ka ioh kam ioh jam bad ban iada ia ka khlaw na ka jingshah pynjot. “Ha ka jingialang ki Sordar bad Rangbah Shnong ngi la rai ban pynsngew sha ka Sorkar ba ngim pdiang ia ka Project Eco Tourism ban pyntrei ha khlaw Nongkhyllem Wildlife Sanctuary bad lada ka Sorkar ka leh da ka bor, ngin sa ujor sha Iing Kashari” la ong u Bah HB Nongrang.