Pyrshah ka VPP ban siew tulop ia ki MDC thymmai, lada ym pat lah ban siew ka tulop barim

Hadien ba ka Executive Committee ka JHADC ka la pynmih ia ka Office Order ha ka 10/06/2025 da kaba rai ban siew tulob lut ia baroh ki MDC thymmai ka JHADC ba dang shu dep jop kynthup ruh ki ophisar bad nongtrei ba dang shu dep thung thymmai, hynne ka sngi na ka liang ki MDC ka VPP u bah Awhai Andrew Shullai uba dei ruh u nongialam ka liang pyrshah ula pynpaw ia ka jingbym sngew iahap halor kane rai namar ba kim shym la leh ha ka lynti ba dei. Haba kren sha ki lad pathai khubor u Awhai Andrew Shullai u ong kane ka hukum ba la pynmih da ka EC dei kaba phylla tam namar ha ki snem ba shadien ka tulob ba sah jong uno uno u bnai man haba ioh pisa la ialeh ban siew dep lut shwa ia kaba rim na uwei u bnai hadien uwei pat da kaba iaid ryntih katkum u lain.

Bad kumba ka tulop jong ki nongtrei ka JHADC ka sah naduh u bnai October 2024, u ong lada dei ba ioh pisa dei ban siew dep shwa naduh u bnai ba sah u October November December ter ter. Hynrei u lyngngoh pat ba lyngba kane ka hukum ba la pynmih ka long, lada ioh pisa ban siew tulob ar bnai ki thmu ban siew tang shibnai jong u snem 2024 kata u bnai October da kaba thmu ban kynthih sha u bnai March ne April jong u snem 2025 khnang ban ioh bhah lang ki MDC thymmai khlem da siew dep ia kaba sah. Ka daw halor kane u Andrew Shullai u iathuh dei ba ki MDC ka liang shynshar hi kiba dang shu dep jop election ki bym lah iaishah haduh ban da dep siew shwa baroh ka tulob barim, bad ban sa ia ioh ryntih lang kumba ka tulob jongki ka sdang naduh u bnai March jong u snem 2025 .

“Haoid na ka liang ki MDC VPP jong ngi ruh don kiba dang shu dep jop hynrei maki pat ki lah hi ban iai shah namar ngi sngewthuh ba ngi wan hangne ym ban kamai pisa hynrei ban shakri iaki paidbah lyngba ka council, katba ki MDC thymmai ba don haka liang shynshar pat balei kim lah ban iaishah” Lada ha kane ka rukom imat wat iaki kyndon treikam ka council ruh kin sa pynkylla mangne shakhmat ong u Awhai Andrew Shullai.