Ka Heprit Shelevah N Jyrwa kaba na Laimer, Upper Shillong kala iohrah ia ka nam lahduh jong ka Sur Kynud ‘Season 4’ kaba la pynhap pyrda noh ha ka sngi Thohdieng ha Don Bosco Youth Centre, Laitumkhrah, Shillong.
Ha kane ka lympung iakob rwai la wan ban iadonlang ka MLA jong ka Shillong East ka Dr. M Ampareen Lyngdoh, u General Councillor Fr. Fidel Orendain na Rome, Provincial ka Shillong Province Fr. John Zosiama, bad bun ngut ki Phadar na South Asia nalor kiwei kiwei ki riewniam bad ki kmie ki kpa bad bahaiing jong ki phra ngut ki nongiashim bynta.
Ha kane ka Final kaba la pynbit pynbiang da ka Don Bosco Media Network Television hapoh ka jingialam jongu Fr. Michael Makri kum u Director, kila don haduh 8 ngut ki samla kiba la poi sha ka kylla ba khatduh ban ia knieh ia ka song pisa kaba T.1 Lak.
Haba kren ha ka jingialang ka Kong Amparenn kala iaroh ia ki bor pyniaid jong ka Sur Kynud da kaba ong, ba kino kino ki kam ba ki riewniam ki leh kadei kaba janai khamtam lei lei haba iadei bad ki samla bad kala iaroh ia ka Don Dosco Youth Centre kaba la lah ban pynlong ia katei ka rynsan iakob rwai kaba long ka rynsan ia ki samla ban pynjanai ia ka sap ba kyrpang ba ki don.
U Fr. Michael Makri ula ong ba ka jingseisoh jong kane ka prokram naduh kaba sdang ka dei na ka jingkyrshan met bad mynsiem jong ki bor bahalor bad pynpaw ka jingsngewnguh ia ki Kmie ki Kpa kiba la kyrshan ia ki khun naduh kaba sdang khamtam ban wan buh wan shaw bad tad haduh ban da kut kane ka lympung iakob.
Ha kane ka sngi, la sam ia ka Cecilia Memorial Award sha u Br. Sniawshngain Papang bad kumjuh ruh ia ka DBMNTV Youth Icon Award 2025 sha u Bah Herbert Kharkongor, Superintendent of Police ka West Khasi Hills bad kumjuh ka jingai sngewbha sha ki nongbishar jong katei ka jingiakob.
Kumba ju long manla u snem ki nongjop ha kane ka lympung ïa kob nalor ba ki ioh khur ïa ka khusnam pisa kaba kot haduh 1lak tyngka kin ïoh ruh ïa ka kabu ksiar wat ban leit shim bynta ha ki lympung kiba heh jong ka ri bad jong ka pyrthei ruh kumjuh.
