Rah ka Franklin bad u Aidamon ia ka nam Mr bad Ms Hynniewtrep ha Delhi

U samla Franklin Marwein bad ka samla Aidamon Talang ki la rah ia ka namlahduh ha ka jingiakop Mr bad Ms Hynniewtrep ba la pynlong da ka Khasi Students Union (KSU) Delhi Unit ha ka sngi Saitjain ha Meghalaya House, Dr APJ Abdul Kalam Road, Delhi. Ki don 6 ngut ki samla shynrang bad 11 ngut ki samla kynthei ba la shim bynta ban pyni ia la sap ka phong ha ka rynsan iakop ki ‘rang kynsai bad ki ‘thei bha briew ban ioh rah ia ka nam lahduh bad kine ki nongiashim bynta ki la pyni ia ka rukom riam tynrai ka jong ki ha ka Traditional Round, Casual Round bad hadien kane la jied tang ia ki 5 ngut ki kynthei bad 5 ngut ki shynrang bad la buh jingkylli ia ki nongiashim bynta da ki nongbishar ha kane ka lympung ia kob thei bhabriew bad rangkynsai.  Na ki shynrang u samla Franklin ula ioh ia ka nam Mr Hynniewtrep, katba u samla Poimi Pdang ula ioh rah ia ka nam First Runners Up bad u samla Ernie Kharchandy ia ka Second Runners Up. Katba na ki kynthei, ka samla Aidamon ka la ioh rah ia ka nam lahduh, katba ka samla Gabriella Duia ka la ioh rah ia ka nam First Runners Up bad ka Enrica Ronghang Second Runners Up.

Ha shwa ban sdang ia kane ka jingiakob la don ka jingialang ha kaba u Symbud Myntri Rangbah ka jylla u Bah Prestone Tynsong ula long u kongsan, ha kaba la iadonlang u MP ka Tura Parliamentary Constituency u Saleng Sangma, u President ka KSU u samla Lambokstarwell Marngar, u OSD bad Political Secretary jong u Myntri Rangbah ka Meghalaya u Bah Daniel Thangkhiew, u MLA ka Jowai u Bah Wailadmiki Shylla, ki nongialam ka KSU Delhi Unit bad ki Khasi kiba shong ba sah ha Delhi.   U Bah Prestone ula iaroh ia ka KSU Delhi Unit kaba la pynlong ia kane ka prokram bad khamtam haba bun ki nongshong shnong ka jylla kiba don ha Delhi ki la wan ban ia donlang ban ai mynsiem ia ka KSU Delhi Unit. U samla Lambokstarwell Marngar ula ong, “Ngi la seng ia ka shnad treikam jong ka KSU kam dei tang ha Delhi hynrei ka don ruh ha Dehradun, Bangalore bad kylleng ki jylla ka thain shatei lam mihngi bad ka jingthmu ka seng ka long ban lum ban lang bad ban kyrshan bad iarap ia la ki paradoh parasnam bad ula kyntu ia ki kmie ki kpa ba kin ai lem ia ka jingkyrshan ia ka KSU Delhi Unit ba kin lah ban ai ka jingshakri kaba kham bha ia ka jaidbynriew.

Ula pynpaw ruh ia ka jingsngewsih bad jingkthang ban iohi ba ki samla ka jaidbynriew kin shah pyndonkam bakla bad ban shah thombor ha kiwei kiwei haba ki don shabar ka jylla.“Ka jingdon ka jong phi ha nongbah Delhi kan dei kata ka shap bad ka muhor jong ka jaidbynriew hangne bad ynda phi leit phai phin long kum kita ki atiar ban noh synniang na ka bynta ka ri bad ka jaidbynriew” ong u nongialam ka KSU. Katba u Bah Daniel Thangkhiew ula ong, ba ka jaidbynriew Hynniewtrep ka dei ka jaidbynriew kaba long kyrpang bad da ka jingpynlong ia kane ka prokram ka wanrah ia ka jinglong kawei jong ka jaidbynriew bad ka long kaba sngewtynnad bad ula kyntu ia ki samla ba wat la ki don shabar jong ka jylla hynrei kim dei pat ban klet noh ia la ka tynrai la jong.