Rah placard bad lama iong ki samla pyrshah ia u Bah Ardent ha Nongstoin

Hadien ba la saphriang ka video ha ki lad pathai khubor ia ka jingai khublei jong u Bah Marbiang Nongsiej ia u Myntri Rangbah ka jylla u Conrad K. Sangma, hadien ba la ioh ia ka Mining Lease ha u snem 2021, na ka liang ka VPP hapoh ka jingialam jong u Bah Ardent ka la rai ban weng noh ia ka rai ai tiket ia u Bah Marbiang na ka party VPP ha Nongstoin. Ia kane la kren pynshai da u Bah Ardent Miller Basaiawmoit ha ka jingialang ban pynshai paidbah ha ïew Nongstoin ha ka 15 tarik u Kyllalyngkot 2025 ha kaba la sakhi ruh da ki spah ngut ki paidbah. U Bah Ardent u la ong, ba kane ka jingsaphriang kane ka durkhih ka la pynlong ia ka party ban pynkylla noh ia ka rai namar ka jingtieng ioh kan don kano kano ka jingktah ia ka party hadien habud namar ba u la iadon bynta ha ka kam ban khaïi dewiong.Shuh shuh u la ong ba um don daw shimet ei ei bad u Bah Marbiang hynrei lada ngim bujli ia ka tiket, kan long kum ka jingpynap shrip ia ka Party, kumta ka Party ka la rai ban ai noh ia ka tiket sha u Dr. Juristman Iawphniaw ban mih bujli ha ka jaka u Bah Marbiang.

Ha katei ka sngi la mih ruh ki nongrah placard bad banner iong ban pynpaw ia ka jingpyrshah ia ka jingshah pynduh tiket jubor ia u Bah Marbiang Nongsiej. Ha kajuh ka por, hynne ka sngi ka la pynlyngngoh ia kiba bun ki nongkyrshan VPP hadien ba katto katne ki samla ki la mih bluit ha khmat ki paidbah da kaba rah ruh ia ki placard bad lama iong kiba la thoh da ki kyntien pynrem ia u Bah Ardent namar ka jingpynduh tiket jubor ia u Bah Marbiangbor Nongsiej khlem ki daw ba shongnia. Kitei ki nongrah placard bad lama iong ki la ieng hakhmat katei ka jaka pynlong jingialang katto katne minit bad hadien ki la mih noh na katei ka jaka.

Na ka liang u Bah Ardent ula siat pharshi ia kitei ki samla ban ieng shwa hangto ban kham itynnad bad u la ong ruh ba ioh lehse kane ka dei ka jingshah ialam bakla. U Bah Ardent u la pynshai ba u Bah Marbiang u la Don bynta ha ka kam khaïi dewiong, kumta lada ym weng ia ka kyrteng jong u kan long kum ban pynap shrip ia ka party hadien habud. Kane ka jingleh jong u Bah Ardent ka la pynlong ruh ia kitei ki samla bad rangbah ban kren pyrshah ruh ia kaei kaba u Bah Ardent u la leh na ka bynta ka Nongstoin naduh ka por u Bah L.G Nongsiej kaba la pynkad ar liang wak ia ka party HSPDP. Ki la kynnoh ba u Bah Ardent u la leh beiñ bad leh donbor ia ka West Khasi Hills da kaba u leh bad rai katba mon khlem da burom ia ka jingsngew ki paidbah ka thaiñ.