Rai ka NPP Jirang Block ban pynïakhun MDC ïa u MLA Bah Sosthenes Sohtun

Ki nongialam ka National People’s Party (NPP) Jirang Block mynta ka sngi da kawei ka sur, ki la rai ban pynmih bad hun beit da ka kyrteng jong u Bah Sosthenes Sohtun u ba dei u MLA ka Jirang Konstituensi ban aireng kum u kyrtong ka party ha ka ileksion MDC kaban sa long shen ha kane ka jylla Meghalaya. Ia kane ka rai la shim hadien ka jingialang kaba ar hapdeng ki nongialam ka NPP’s Jirang Block ba la donlang naduh ki nongialam ka NPYF, ki longkmie, ki riew rangbah bad ki nongialam shnong ka Jirang Konstituensi, ki la pynpaw ia ka jingiahun lang ban pyniakhun noh da u Bah Sosthenes Sohtun ha ka ileksion MDC 2025 na Jirang Konstituensi. Lah ban kdew, ba dang shen u Bah Victor Rani, MDC ka party NPP u la mih noh na kane ka party ban leit pyniasoh noh sha ka party Congress, ha kaba ka la don pat ka jingmih jong ki lai ngut kiba. la pan tiket na ka NPP ban aireng ha ka ileksion MDC kiba kynthup ia u Bah Albertus Lapang, u Bah Kitbok Khongiong bad Bah Balawan Syiemiong, hynrei namar ka jingkhim jong ka por na bynta ka ileksion MDC na ka liang ki nongialam ki la sngewbit beit ba ia ka tiket yn aiti ban iakhun da u Bah Sosthenes Sohtun.

Haba kren bad ki Nongthoh Khubor, u Bah Siewdor Syngkli, President ka NPYF Jirang Block bad ka Kong R U Kharbani, Spokeperson, ki la pynpaw ba kum ka party ka dap da ka jingkmen kaba khraw halor ka jingia tylli lang kawei jong baroh ki nongialam ka party ha ryngkat ki paidbah nongkyrshan kiba la hun lang ia kawei ka rai ban pynmih ia ka kyrteng jong u MLA Bah Sosthenes Sohtun ban aireng hi dalade ha kane ka ileksion MDC hadien ka jingmih ka kynrum kynram na ka jingphet seng noh u MDC ka party u Bah Victor Rani. Ki la pynpaw ruh, ba watla na ka liang ka party NPP Jirang Block ka la ioh ia ka jingtyrwa ia ki kyrteng jong ki 3 ngut kiba la pan ia ka tiket, hynrei namar ka jinglong ka por ka long kaba lyngkot ban iaid shakhmat ia ka kam na bynta ka ileksion MDC namar kam long kaba suk kumta na ka liang ka party hi ki la aiti ia u MLA ba un hap hi ban shimti ia ka kam kum u kyrtong ban iakhun ha kane ka ileksion MDC 2025.

Shuh shuh ruh, ki la pynpaw, ba kum ka party hi kan nang treishitom da kawei ka jingmut kumno ban nang pynkhlain ia ka party ha Jirang Konstituensi na bynta ban wanrah ia ka jingjop kaba don burom ia u Bah Sosthenes Sohtun ha kane ka ileksion MDC bad kiwei kiwei ki ileksion kiba sa wan da kaba khot wer ia ki paidbah nongkyrshan ka party ba kin nang iai ai ka jingkyrshan kaba radbah ia ka party kumba ki la iai kyrshan ia kane ka party ha ki snem kiba la leit noh.