Rai ka sorkar ban pynmih ïa ka “Five Year Vision Plan’ halor u khaw rashon

Ka Sorkar Jylla kala rai ban pynmih ia ka “Five Year Vision Plan’ ha kaba iadei bad ka jingsam rashon ne ka Targeted Public Distribution System (TPDS) hapoh ka jylla bad ia kane ka rai la shim ha ka jingialang kaba la pynlong da ka Department of Food, Civil Supplies and Consumer Affairs (FCS&CA) ryngkat ka jingiatreilang bad ka United Nations World Food Programme (WFP). Lyngba kane ka Vision Plan ka don ia ka jingthmu ban pynkhlain ia ka jingshngain ka jylla halor ki marbam mardih, kaban ioh da palat 21 lak ngut ki briew, ia kaba la antad ba kan long kumba 80 percent na ka jingdon ki paid nongshong shnong. Haba pyniaid ia kane ka jingialang, u Myntri Sorkar uba khmih ia ka Food Civil Supplies & Consumer Affairs u Bah Methodius Dkhar ula ong, ba la buh hakhmat eh ban pynthikna ia ka jingshngain bad jingpahuh ka bam na ka bynta baroh ki nongshong shnong ka Meghalaya, khamtam eh na ka bynta kito kiba don ha ki kyndon kynshrot bad kiba shah iehbein.

Ula ong, ba kane ka jingialang kadei ka sienjam jong ka jingiatreilang bad ka WFP ban shim ia ki lad ki lynti ban iaid nangne shakhmat bad ki buit treikam jong ka TPDS ha kaba yn pdiang ruh ia ki jingkylla lyngba ki kor ki bor kiba mynta bad ki buit treikam. “Ngi iengskhem ban tei ia ka jingsam ia ki marbam mardih ha ka lynti kaba paka bad kaba khuid ba suba khnang ba yn um don mano mano ruh kiban shah iehnoh shadien” ong u Bah Methodius. Katba ka Country Director jongka World Food Programme India ka Elisabeth Faure kala ong, “Ka Sorkar Meghalaya ka don ia ka jingiohi jngai ban sam ryntih ia ki marbam mardih kala long ka sienjam kaba kongsan ha ka thain”.

Kala ong ba ka WFP ka sngewsarong ban kyrshan ia kane ka lynti jong ka jingkylla bad lyngba ka jingiashimbynta lang ryngkat ka jingiaid da ki jingtip kiba biang, kumta la kyrmen ba ka WPF kan kyrshan ia ka Meghalaya ban pyni iaka jingshalan bad ki lad jingshngain ki lah ban treikam bha na ka bynta man la ki longiing, ban pynthikna ba kan don ka jingshngain ia ki marbam bad ia ka bam kaba tei ia baroh. Kane ka jingialang kala pynmih ia ka jingiohi jngai, ki buit treikam kiba dei ban shimkhia mardor bad ki lynti ban wanrah ia ka jingkylla ha ka rukom pyniaid beit pyniaid ryntih ia ka TPDS, kaba long ruh ka jingiaid ryngkat lang bad ka thong jong ka ri bad ka SDG.