Rai ka sorkar ban pyntreikam ia ka Vehicle Scrappage Policy

Khnang ban pynduna ia ka lyer jaboh ba mih ki kali bad ban lait na ka jingdheng kali ha nongbah Shillong, ka sorkar ka la rai ban pyntreikam noh ia ka Vehicle Scrappage Policy. Ia kane ka rai la shim hynne ka sngi ha ka jingialang jong ka kynhun Myntri sorkar. Haba kren sha ki lad pathai khubor u nongaiktien ka sorkar uba dei ruh u myntri, u bah Paul Lyngdoh u la ong ba tang ha nongbah Shillong ki don haduh 3 lak duna tylli ki kali. Namarkata ka sorkar ka la shim ia ka rai ba kito ki kali sorkar kiba la dap 15 snem shaneng bad ki kali shimet kila dap 35 snem shaneng, kin hap hapoh kane ka polisi bad ym shah shuh ban iaid sahuh ha surok.

“Ki kali sorkar kiba la dap 15 snem shaneng kin hap ban die kilo noh katba ki kali shimet kito kiba 35 snem shaneng kin hap ban pynkylla mar jot bad ym shah shuh ban iaid ha surok. Haduh mynta ki  don kumba 5 hajar tylli ki kali sorkar bad 8 hajar tylli ki kali shimet kin hap ha kane ka polisi,” la ong u nongaiktien ka sorkar jylla u bah Paul.

Ula ong ba ynda la pyntreikam ia kane ka Policy, kin don haduh 13 hajar tylli ki kali kiba yn nym lah shuh ban iaid ha surok. “Kane ka sienjam kan dei ka jingsdang bad hadien ba la pynkhuid ia kine ki 13 hajar kiba la don ha ka thup, ka sorkar kan sa shim ia ka sienjam kaba ar,” ula ong.