Rai ka sorkar ban sangeh ai License dukan kiad thymmai

U Myntri ka tnat Excise u Bah Kyrmen Shylla ula pynksan ba ka tnat kan ym ai License thymmai shuh ban buh dukan kyiad (Wine Store) hapoh ka Jylla. Haba kren sha ki lad pathai khubor u Bah Kyrmen ula ong, ba ka tnat ka la bthah ia ki Ophisar ban bud dien haba ia dei bad ka jingdon ki dukan kiad (Wine Store) hapoh ka Jylla khamtam haba ia dei bad ki dukan kiba don marjan bad ki Hospital bad ki jaka pule. U Bah Kyrmen ula ïathuh ïa kane ka rai la shim hadien ba la ïoh jingujor na ki trai dukan kiad (Wine Store) kiba la don lypa ba kim don ka jingdie ne kim ioh nong shuh namar ka jingsdang bun palat ki dukan ha kajuh ka jaka.

“Da kaba pynshong nongrim ia ka jingujor, ngi sangeh noh ban ai License thymmai. Ngin sa bishar bniah bad hadien kata ngin sa iaid shakhmat da ki License thymmai. Lada ngi iohi ba ki dukan ki duna bha ha kawei ka jaka hynrei ka jingdie ka long kaba heh, ngi kwah ban ai License hynrei ngim lah ban ai beit bad ki nong Apply License ki dei ban pyndep ia ki jingdonkam khamtam haba ia dei bad ka No Objection Certificate (NoC) na ki Rangbah Shnong” la ong u Bah Kyrmen.

Halor ka jingkynnoh ba don ki dukan kiad hajan skul bad ki jaka Pule, u Myntri ula ong, ba ka tnat Excise kan sa peit ia kane ka kam hynrei haduh mynta kam pat don kano kano ka License ba thymmai ba ka tnat ka ai. U Bah Kyrmen ula ong, ba ka tnat kam lah ban leh eiei ia ki dukan kiba la don lypa ha kita ki jaka hynrei lada ki trai dukan ki kwah ban kynriah noh shawei, ka tnat kan iarap ia ki khnang ba kin nym duhnong.