Rai u Bah Teibor ban ïakhun kum u kyrtong shimet ha ka ilekshon MDC

U MDC ka Mawlai u bah Teiborlang Pathaw hynne ka sngi ha ka jingialang paidbah ba long ha Mawlai u la rai ba un iakhun kum u kyrtong shimet ha kane ka ilekshon MDC ban long shen.U bah Teibor haba kren ha ka jingialang ba la pyllong da ka Mawlai Social Service Organisation (MSSO), ula ong ba lada ki paidbah ki kwah ia u ban ieh noh ia ka Jersey ka Kot (NPP) bad lada ki kwah ba un iakhun kum u kyrtong shimet, u long uba kloi ban kohnguh ia ka mon u paidbah. “Lada  phi kwah ba ngan iehnoh ia kane ka jersey ba mynta, nga ruh nga rai ban pyndem ha ka mon jong u paidbah bad lada phi mon ianga ba ngan iakhun kum u kyrtong shimet, nga rai ba ngan iakhun kum u kyrtong shimet namar dei maphi ba pynshong bad ban pynieng ianga,” ong u bah Teiborlang. Lah ban pynkynmaw ba u Bah Teibor u la jop ia ka ilekshon MDC na Mawlai ha u snem 2019 kum u kyrtong shimet, bad shwa ka ilekshon MLA 2023 u la leit ban pyniasoh bad ka seng NPP, kaba ki paidbah kim sngewtynnat satia bad kaba la pynlong ia u ban shah rem ha ka ilekshon MLA.

Ha kane ka jingialang, ki paidbah nongkyrshan kila kyntu ia u bah Teiborlang ban iakhun ia kane ka MDC da ka uniphom thymmai, ym shuh da ka Jersey Kot ne NPP. Ki nongkren bapher bapher kila pynpaw ba watla ki paidbah ki ieid palat ia u bah Teibor hynrei ka jingiakhun jong u na ka party NPP ha kane ka elekshon MLA kaba la dep, kam shym la wanrah ka jingsngew tynnad ia ki paidbah bad ki kyntait shi syndon.“Ngi kwah ba phin iakhun kum u kyrtong shimet”, la ong ki rangbah bad ki longkmie kiba ai ka jingkren ha kane ka jingialang.

Ki la pynpaw ba u bah Teibor u la pyrshang da ka bor baroh ban shakri hok ia ki paidbah ka Mawlai ha kine ki snem ba u long MDC. “Ngi na Mawlai Nonglum, ngi kwah eh haduh katta katta ia u bah Teibor ban law noh ia ka sopti rim, ban phong da kaba thymmai”, la ong uwei u rangbah. Ki la ong ba ki kwah ba u bah Teibor ban iakhun kum kyrtong shimet ban long laitluid ban shakri ia ki paidbah, ban kren ia ki mat, ym ban shah teh shah khum. “Ki paidbah ka Mawlai ki ieid eh ia u bah Teibor hynrei ka jingiakhun jong phi na kato ka seng, ka la pynbynniaw ia ki watla ki ieid ia iaphi hynrei kim sngew tynnad ia ka party”, la ong iwei i kong.