Rakhe ka Bharat Scouts and Guide ia ka jingdap 75snem

U Lat ka Jylla u CH Vijayashankar hynne ka sngi ula plie  ka jingrakhe ia ka jingdap 75 snem ka ‘Foundation Day’ ka Bharat Scouts and Guides ha Shillong. Kane ka prokram ka dei shibynta ka jingkynmaw ia ka jingiaid lynti ka kynhun naduh u snem 1950, ba ka Hindustan Scouts, ka Boy Scout Association of India bad ka Girl Guides Association ki la ia wanlang hajuh ban thaw kawei ka kynhun ka Bharat Scouts and Guides. Ha kane ka jingrakhe u Lat ka Jylla ula ai khublei ia baroh ki dkhot, ki nongialam bad ki volunteer jongka Bharat Scouts and Guides ha kane ka sngi kaba kyrpang.

U Lat ula ai ka jingïaroh ia ki Meghalaya Bharat Scouts & Guides ha kaban saindur ïa ka akor ka burom, ka jingshakri, ka jingsngewrit bad ka jinglong nongïalam hapdeng ki samla ka jylla. Ula iaroh ruh ba hapoh ka jingïalam u State Chief Commissioner uba dei ruh Commissioner & Secretary ka tnad Pule Puthi, halor ka jinglah ban pynlong ïa ki prokram bad kiba seisoh bad ia ki jingialang kiba la ïarap ïa ki khynnah shynrang bad kynthei ban san ban heh da ka jingkmen, jingkoit jing khiah bad kum ki nongshong shnong kiba don ia ka jingkitkhlieh. U Lat ula sam ruh ia ka Governor’s Scouts and Guides Award sha palat 350 ngut ki Scout and Guides bad ula ai khublei ruh ïa ka M Wahlang bad Purnima Thapa, kiba la ïoh pdiang ïa ka khusnam President’s Scouts and Guides Award, kaba la ai mynsiem shuh shuh ia ki ban jam shakhmat da ka jingshlur, jingkitkhlieh bad ka jingkut jingmut ban shakri ia ka imlang sahlang.

U Lat ula banjur ia ka jingdonkam ban pynsngewthuh kham bha shaphang ka jingsumar bad jingiada ia ki khlaw ki btap, ka jinglong ka suinbneng bad ki rukom treikam kiba lah ban pynneh pynsah ha ka Jylla Meghalaya bad ula wer ia ki Scout and Guides ban thung uwei u dieng bad ban ialam ia kane ka sienjam bad ban btin ia ki samla ban iada ia ki khlaw, ban pynneh pynsah ia ki jinglong jingman jong ka maei mariang, ban pynduna ia ka jingpyndonkam ia ki plastic bad ban kyntiew ia ka jinglong ba don ia ka jingkitkhlieh ha ka imlang sahlang.