Rakhe ka DSWO, West Khasi Hills ïa ka sngi ki tymmen

Ka ophis treikam jong ka District Social Welfare Officer, West Khasi Hills District, Nongstoin ha ryngkat ka jingiatrei lang bad ka God’s Dream Home Centre mynta ka sngi ka la pynlong ïa ka jingrakhe ïa ka sngi kyrpang ïa kiba la noh ka rta lane ka International Day for Older Persons 2024 halor ka phang “Ageing with Dignity: The importance of Strengthening, Care and Support Systems for Older Persons Worldwide”. kaba mut “Ka jinglong tymmen ryngkat bad ka burom: Ka jingdonkam ban pynkhlain, ban sumar bad ban kyrshan ïa ki riew tymmen haka pyrthei baroh kawei”. Ïa kane ka prokram la pynlong ha God’s Dream Old age Home, haka shnong Kynshi Mawtei jrong, Eastern West Khasi Hills District.

Ha kane ka prokram la wan ban donlang u Sordar ka shnong Kynshi Mawteijrong u bah K. Syiemlieh kum u Kongsan ryngkat ka jingdonlang ka Kong D. Pakyntien District Social Welfare Officer, West Khasi Hills District, Nongstoin,u Rev. C. Marbaniang, ka kong W. Lyngdoh Coordinator God Dreams Home, bad ki riewtymmen riewsan ba dei na ka thain Kynshi. U bah K. Syiemlieh haba kren kum u kongsan u la ai ka jing khublei ia ka ophis treikam jong ka DSWO baka la ai lad ïa ka God’s Dream Home Centre ba ki la shim ïa kane ka prokram naka bynta ban pyniakynduh lang ïa ki riew tymmen jong ka dong bad ka thain Kynshi bad kumjuh ba kila pynlong ïa kane ka prokram ban leh burom ïaki riewtymmen ki ba la 60 snem ka arta shaneng.

Kiwei pat kiba kren ha kane ka sngi ki kynthup ïa ka Kong D. Pakyntien DSWO, West Khasi Hills District, Nongstoin, bad u pastor. C. Marbaniang. Ha kane ka sngi la ioh ruh ïaka jingsam Ïa ki jingai sngewbha sha kito ki nongshong shnong kiba la noh ka arta kiba wan ban shim bynta ha kane ka jingialang.