Rakhe ka Jylla ia ka sngi ki khynnah kynthei ban pynkup ha ka imlang sahlang

Ka Tnad Social Welfare ka Sorkar Jylla hynne ka sngi, ka la rakhe ia ka International Day of the Girl Child 2025 ha Lariti International Centre for Performing Arts & Culture Auditorium, Shillong, halor ka phang “Ka Khynnah Kynthei kaba Nga Long, Ka Jingkylla kaba Nga Ialam: Ki Kynthei kiba don ha khmat eh jong ki jingeh,” Ha kane ka sngi la sam ia ki Sanitary Pads sha ki khynnah kynthei na ki skul bapher, ka jingpynbna ia ka ‘Safe Motherhood’ program, ka jingpynkup burom ia ki khynnah kynthei, ka jingsam ia ki cheque sha ki NGO bad ia ki jaka kiba ri bad sumar ia ki khynnah bad ka jingsam lyngba ka kor digital ia ki jingai jingkyrshan kaba kot T.40 lak sha ki nongtrei Anganwadi hapoh jong ka Pradhan Mantri Matru Vandana Yojana. Ia kane ka jingrakhe la wan iashim bynta u Myntri Rangbah ka Jylla Conrad K Sangma kum u kongsan, u Nongaibuit ka Tnad Social Welfare Bah Paul Lyngdoh kum u symbud kongsan ki heh ophisar sorkar bad kiwei kiwei.

U Myntri Rangbah ha kane ka sngi ula ialam ia ka jingialang ban sngap jar kaba ar minit kum ka jingpyndon burom ia ki jingim jong ki Khynnah kiba iap ha ki jingjia ba dang shen, haba pynkynmaw ia baroh ia ka jinglong synjor ka jingim bad ka jingdonkam ban peitngor bad ban iada. U la ban jur ka jingrakhe ka dei ka jingsdang jong ka jingkylla ha ka imlang sahlang ha ka ban ai jingkyrshan ia ki khynnah kynthei bad ula kren ia ki sienjam kum ka jingpynkha ia ka Reusable Sanitary Pad Unit ba la bei tyngka da ka Chief Minister’s Special Development Fund bad ba pynmih da ki Self Help Group, kaba kyntiew ia ka jingkupbor ia ka ioh ka kot ha ka thain. Ula kren ruh halor ki sienjam ba thymmai hapoh ka Safe Motherhood Program kynthup ki song sumar ia ki Kmie na Nongkyndong da kaba ai ia ki tiar na ka bynta ki Khunlung ba dang kha bala pynmih da ki Self Help Group. Ula ban jur ia ka jingkongsan ka jingshngain ki Khynnah, haba kdew ia ka bynta jong ka technology, ki prokram ha ka imlang sahlang bad ka jingiatreilang bad ki seng trei mon sngewbha bad ki seng niam.

U Myntri Rangbah ula kren halor ka jingpynkhain ia ki jaka ai jingsumar kum ki detox bad de-addiction centre, ka jingpeitngor ha ka imlang sahlang bad ka jingpyrshang ban tehlakam ia ka jingwan poi u droks bad ula pynshlur ia ki khynnah kynthei ba kin pyrkhat laitluid, ban shim ia ki rai da ka jingsngewskhem, ban bat ia la ka akor ka burom. Ha ka jingïathir, ki samla pule ki la kren bad iatai sani bad u Myntri Rangbah ka Jylla, da kaba pynpaw ïa ki jingeh bad ki jingai jingmut halor ki mat kiba bun jait bad kane ka jingiakren ki kynthup ia ka jingdonkam ban pynbha ia ka jingbam sngi ha ki skul, ban pynbha ia ki lad jingiada na ka bynta ki khynnah kynthei, ban wanrah ia ki jinghikai ban iada ialade, bad ban ai jingkyrshan kham bun ia ki nongialehkai kiba dang khynnah bad kiwei kiwei ki mat.