Rakhe ka Patharkhmah Civil Sub Division ïa ka lyngkhuh ba 53 snem ka jylla

Shibynta ban lehkmen lang bad ka jylla hi baroh kawei ha ka jingrakhe ia ka lyngkhuh snem kaba 53 jong ka jylla Meghalaya naduh ba la ioh ia ka jylla ba pura kata naduh u snem 1972, ki bor ka Patharkhmah Civil Sub Division ki la pynlong lang ia ka jingrakhe kaba kyrpang, kaba la long hakhmat ka ophis jong u Block Development Officer ka Jirang C&RD Block. Ha kane ka jingrakhe, la wan ban shimbynta lang da u Bah Sosthenes Sohtun, MLA ka Jirang Konstituensi kum u kongsan, ka Kong Margaret Lyngdoh kaba dei ka Folklorist na ka skulbah Tartu Estonia, u Bah MB Tongper, Sub Divisional Officer ka  Patharkhmah Civil Sub Division, u Dr. P Hajong, BDO ka Patharkhmah C&RD Block, Paiem H. Wahlang, Syiem ka Hima Jirang, ki ophisar na ki tnad treikam bapher bapher nalor kiwei kiwei ki riew rangbah ka thaiñ Jirang.

Haba kren ha kane ka sngi, u Bah Sosthenes Sohtun u la pynpaw ia ka jingkmen kaba khraw ban ia don bynta lang ha kane ka jingrakhe ia ka jingioh jylla kaba pura jong ka jylla Meghalaya ha kaba ka Patharkhmah Civil Sub Division ka la ioh ban rakhe naduh ba la ioh ia ka kyrdan Civil Sub Division kaba pura. Kum u nongmihkhmat ka thaiñ, u la pynpaw ia ka jingsngewnguh kaba khraw halor ka jinglen lade jong ki riew khraw kiba la len lade ha ka jingiakhun ban ioh ia ka jylla kaba laitluid bad kaba pura jong ka jylla Meghalaya, ha kaba la sakhi ruh ia ka jingnang kiew sted jong ka jylla ruh ha kine ki snem ha ki liang baroh khamtam ki lad pynroi bapher bapher da ka jingtreishitom jong ki bor ka sorkar jylla.

“Ka thaiñ Ri Bhoi Sepngi, kaba dei kawei na ki thaiñ kaba la sahdien bha ha ki snem kiba rim hynrei dei hadien u snem 2018 terter ba kane ka thaiñ ka la sakhi ia ki jingnang tuid ki kam pynroi bapher bapher naduh ka pule puthi, ka koit ka Khiah bad wad ha ki lynti ki synkien, kaba la pynmyntoi shikatdei ia ki paidbah ka dong ka thaiñ”, ong u Bah Sohtun, da kaba bynrap ruh ba kum ka jylla ha ryngkat ka thain Ri Bhoi Sepngi kan nang iai roi bad nang kiew ha ki snem kiban nang wan. Ha kane ka sngi, la pynphuh pynphieng ruh da ki jingrwai bad jingshad ba la shimbynta da ki nongtrei SHG, Village Organization bad ki samla ka thain Jirang bad la sam ruh ia ki MTab sha ki samla pule jong ka thaiñ Jirang ia kaba la mang lyngba ka Student Learning Aids Scheme.