Rakhe ka PHE ia ka ‘World Plumping Day, 2026’ ha Mawkyrwat

Ka ophis u Executive Engineer (EE) ka tnat PHE, Mawkyrwat Division hynnin ka 11 tarik u Lber, 2026 ka la rakhe ia ka sngi kyrpang jong ki nongtrei pipe um ne ka ‘World Plumping Day 2026’ bad kumjuh ruh ïa ka ‘Jal Mahotsav’ ha ka jingialang kaba la pynlong hapoh ka Hall jong ka ophis u EE ka tnat PHE Mawkyrwat Division, South West Khasi Hills District.

Kane ka programme ka la long kaba shongshit shongshngain ha kaba la pynsngew ruh halor ka jinglah jong ka ophis ryngkat bad ki bor shnong ban pyniaid beit pyniaid ryntih ia ki skhim sorkar hapoh ki shnong ki thaw, khamtam eh ia ka skhim um ne ka Jal Jeevan Mission. Ha kane ka program la wan ban iashimbynta da ki 10 tylli ki shnong ba kynthup naduh ki Myntri Shnong, ki Secretary Shnong, ki Self Help Groups lem bad kiwei de.

Haba ai jingkren ha ka jingialang, u EE ka tnat PHE, Mawkyrwat Division, Bah K. Nongbsaw u la ai ka jingiaroh ia ki Rangbah Shnong halor ka jingkitkhlieh jong ki na ka bynta ka jingiaid beit iaid ryntih jong ka jingpyntrei ia ka skhim sam umbam umdih ne ka Jal Jeevan Mission. U la iathuh ruh ba ki don ki shnong kiba la shim ia ka jingkitkhlieh ban lum syndon da u synniang na baroh ki thliew iing bad ban buh ia utei u synniang ha ka pla tyngka jong ka Village Water & Sanitation Committee (VWSC) na ka bynta kino kino ki jingdonkam hapoh shnong bad khamtam eh ban maramot ia ki pipelines ne ia kino kino ki bynta lyngba katei ka pisa.

Ha kane ka jingrakhe la ioh ruh ban sam ia ki syrnod sha ki 10 tylli ki shnong kiba la wan ban iashimbynta, bad la ioh ruh ia ka jingshim smai ba la lamkhmat da u Executive Engineer ka tnat PHE, Mawkyrwat Division, bah K. Nongbsaw. Shuh-shuh ka la don ruh ka jingpyni halor ka jingtest ïa ka jingkhuid jong ka um da ka kong B. Shangdiar na ka shnong Nonglang, bad ka jingpyni nuksa ban ot thret ne pyndait ïa ki pipe um lada don kano kano ka jingthut lyngba u bah T. Dkhar bad u bah B. Myrthong.

Kiwei pat kiba iadonlang ha kane ka program ki kynthup ia u bah T. Lyngkhoi, Junior Engineer ka PHE Mawkyrwat Division, lem bad kiwei de ki riew rangbah.