Rakhe ka Tasku Ayush Health Centre ban pynneh ka rukom sumar dawai kynbat tynrai

Ha ka jingiaid lynti ba 10 snem ha ka kam shakri ïa ki Nongpang da ki dawai Kymbat lane ki dawai Ayurvedic, mynta ka sngi na ka liang ka Tasku Ayush Health and Wellness Centre mynta ka la rakhe ïa ka sngi jong ka Ayurveda ba 10 snem da kaba program lyngkot ïa kaba la ioh ban pynlong ha Tasku Govt LP School halor ka phang Ayurveda.

Ka jingrakhe ia kane ka sngi kum ka Ayurveda Day ka dei halor ka ka jingthmu ban nang pynneh pynsah ïa ki dawai Kymbat bad ban Pynshlur ruh ïa ki Paidbah ba ki dei ban ri ban sumar bha ïa ka Mei Mariang khnang ba ngin nang lah ban ioh ia ki dawai kymbat kiba biang bad ba ngin dang lah ruh ban sumar ïaki Briew da kine ki dawai kymbat kiba duna ruh iaka jingktah iaka koit ka khiah.

Ha katei ka jingrakhe la sakhi ruh da ka jingdonlang u Bah Sosthenes Sohtun MLA ka Jirang, ba dei ruh u myntri ka tnad C&RD ka sorkar jylla kum u kongsan haka jingdonlang u Dr M Lamare Ayush Medical Officer ka Civil Hospital Nongpoh, ka Dr Vivid Rose Kharsyntiew, Bah B Lyngdoh 2nd OC ka Patharkhnah lem bad kiwei kiwei.

Haba kren naka liang u Bah Sosthenes Sohtun kum u Nongmihkhmat u la Pynpaw ka jingainguh ïaki nongpyniaid iaka program kiba la kynmaw ban rakhe ia kane ka sngi Ayurveda kaba long Kum kawei naka kam ban Pynshlur ïa ki paidbah ban pyndonkam ia ki dawai kymbat kiba long ruh ki dawai ki bym don iaka jingktah haka koit ka khiah.

U la ong ruh, U Myntri Rangbah ka ri bad u Myntri Rangbah ka jylla ki don ïa ka jingangnud ban thaw ki lad ki lynti naka bynta ki paidbah nongshong Shnong ka jylla ban kyntiew iaki jaka sumar Ayurvedic bad u la ong ruh, ka Ayurveda ka dei kwei naka rukom sumar ba la rim tam bad ba la ju iai bteng ban leh naduh hyndai.

U Bah Sosthenes u la ong ruh, ha kane ka por ka juk kaba mynta ka la wan da kiwei pat ki rukom sumar hynrei haka jingim jong ngi ki briew ngi dei ban pynïaryngkat bad ka rukom im naduh ka jingsumar ïaka Mei Mariang kaba ai ha ngi ki briew iaka lyer kaba ngi ring mynsiem bad haduh ka Koit ka khiah kaba aibor iangi ban trei ban ktah.