Rakhe ki BSF ïa ka Raising Day kaba 60

Ki shipai Border Security Force hynne ka sngi ki la pynlong ia ka jingrakhe iaka BSF Raising Day kaba 60, da kaba pynlong ia ka prokram ha Frontier Headquarters ia kaba la wan ban iashimbynta da ki shipai BSF na kylleng ki Unit jong ka jylla Meghalaya. Kane ka jingrakhe ka long kum ka jingrakhe ia ka jingjam shaphrang jong ka BSF bad kumta ki shipai BSF ryngkat bad ki bahaiing bahasem ki jongki bad ki shipai kiba la shongthait kila wan ban iashimbynta da ka jingkmen halor ka histori jong ka jingiaid shakhmat jong ka BSF.

La pynlong ia ka Barakhana, kaba dei ka jingsam ia ka bam da ki shipai kiba dang don ha ka kam bad kiba la shongthait na ka kam kaba kila ai jingshakri da ki phew snem. Ki shipai kiba la shongthait ban shakri ha ki kyrdan bapher, kila pynpaw shaphang ka rukom shakri ka jongki bad kila pynpaw ruh iaka jingsngewsarong ban long ki shipai BSF ban iada ia ka ri.

La pynlong ia ka jingrakhe ia ka BSF Raising Day, kum ka dak ban kynmaw ia ka jingsdang ia kane ka kynhun shipai ha ka 1 tarik u Nohprah jong u snem 1965 ban pynkynmaw ia ka kamram kaba khia jong ki shipai BSF na ka bynta ban ai jingiada bad jingshngain ia ki paidbah ka ri India khamtam eh ia kito kiba sah ha ki thaiñ khappud da ka jingdon jong ki shipai BSF kiba pahara ha kitei ki jaka. Ha kane ka jingrakhe la wan ban iashimbynta da ki heh ophisar BSF, kiba la pynpaw ia ka jingsngewnguh ia ka jingieng skhem jong kane ka kynhun shipai ha kaban ai jingshakri bad aiti na ka bynta ka ri.