Rashtraputra: Ka nongbah Shillong ka la pyni ia ka kam ba ai mynsiem u Netaji

Shillong, Nailar : Ha u snem 2022, u Myntri Rangbahduh ba donburom u Narendra Modi ula pynbna ba ïa ka lyngkhuh sngi kha jong u Netaji Subhash Chandra Bose, kata ka 23 tarik u Kyllalyngkot yn rakhe kum ka Prakram Diwas. Kum shibynta jong kane ka jingai burom, u mot baheh jong u Netaji u ieng mynta ha Kartavya Path, India Gate, kaba pyni ia ka mynsiem ba shlur bad ka jingaitilut jong u na bynta ka jinglaitluid jong ka ri India.

Kum ka jingithuh ia ka bynta ba khraw jong u Netaji ha ka jingiakhun ban ioh ia ka jinglaitluid, ka Netaji Institute of Skill Development (NSID) ka la pynmih bad pyni ia ka drama “Rashtraputra”, kaba pyni ia ka jingim bad ka pateng jong u Netaji Subhash Chandra Bose. Ia kane ka drama la thoh da u Abhaya Kashyap uba dei u Director ka Rashtriya Jagriti Sansthan bad ia kane ka drama la ju pyni mynshwa ha India International Centre bad ha India Islamic Cultural Centre, New Delhi.

Ka NSID ka la sdang ia ka kynhun jong ki nongak ban pyni ia ki drama kiba ia dei bad ka jingim jong ki riewshlur jong ka ri. Hadien ka Rashtraputra, ka kynhun ka dang trei ïa ka jingpynmih thymmai halor ka jingim jong u nongïalam ba khraw u Purno A. Sangma, hapoh ka kyrteng ‘Son Rises from the East’, kaba la buh ban pyni ha ka 1 tarik Nailur 2026.

Kum shi bynta ban rakhe ia ka sngi laitluid jong u snem 2025, la pyni ia ka “Rashtraputra” ha Shillong ha ka 14 tarik Nailar 2025 ha Rai Auditorium, Headquarter DGAR, Laitkor, naduh ka por 11:00 Mynstep haduh 1:00 Nohphaisngi. Ia kane ka jingialang la pynlong hapoh ka jingpeit jong u Lt Gen VikasLakhera, AVSM, SM, Director General Assam Rifles bad la kyrshan da ka PASangma Foundation bad ka Rashtriya Jagriti Sansthan.

Ha kane ka sngi u Myntri Rangbah ka Jylla, Conrad K. Sangma ula plie ia ka jingialang kum u Kongsan bad la pynlong ruh ia ka prokram ba kyrpang ha ka por janmiet na ka bynta ki shipai jong ka Assam Rifles bad kiba haiing hasem jong ki.

Ki jingngeit jong u Netaji ki dang long ka jingshai ba ialam lynti ia ka ri. Dei u Netaji uba la pynkup ia u Mahatma Gandhi ia ka nam Rashtrapita. Ka long kaba dei barabor ba ngin burom ia u kum u Rashtraputra u khun jong ka ri. Ka jingim jong u ka long ka jingpynshisha ia ka jingshlur, ka jingaitilut, ka jingiashah ia baroh ki niam bad ka jingieit ri.

Mynta, katba u mot jong u Netaji u don ha Kartavya Path, u khot ia uwei pa uwei u nong India khamtam ia ki samla ban bat bad iada ia ka jinglaitluid kaba ula iakhun shitom na ka bynta kaba u la aiti ia la ka jingim. Lyngba u Rashtraputra, ngi kyrmen ban ai mynsiem ia ki pateng ban wan ban bud ia ki dienjat jong u bad ban shakri ia ka ri da kajuh ka mynsiem ba shlur.