Ryngkat ki ummat kthang shimti kiba haiing ia ka met kiba iap Pynrem jur u Dr. Mukul Sangma

Ïa ka met jong ar ngut ki Rangbah ba la khlad noh ha ka jingjia aksident ba la jia hynnin ka janmiet la rah noh da kiba haiing hadien ba ki pulit bad ki bor ba dei peit ia ka Civil Hospital Nongpoh ki la pyndep ïa ka kam ram ne ka Postmortem.Na ka liang kiba haiing Jong u Sanbirth M. Momin uba dei u Nongniah ia ka kali jong ka Ophis District Sports Office, North Garo Hills District, Resubelpara, ki la rah noh sha jaka sah jong u ban pyndep ïa ka jingleh burom khatduh bad ïa ka met jong u Smart Sangma la rah noh da kiba haiing sha Ampati ban pyndep ia ki jinglehniam ba khatduh. Ha katei ka sngi, ha shwa ban rah noh ia ka met jong kitei ki ar ngut ki Rangbah na ka liang kiba haiing bad ki paralok ki la pynlong ïa ka jingduwai ha ryngkat ki um Kthang.

Kum ban shu pynkynmaw kane ka jingjia aksident ka la jia hynnin ka janmiet katba u Sanbirth M Momin lem bad arngut ki paralok u dang kiew sha Shillong ban leit shaw ïa ka District Sports Ophisar jong ka North Garo Hills District, Resubelpara ka Kong Linza Fenny Syiem bad mar ïa poi ha ki bynta Surok bah jong ka Shnong Umsaw Nongkharai kawei ka trok kaba la pynher sted bha da u driver na ka jingshoh khawïang ka la ryngkoh na kawei ka surok bah sha kawei pat bad ka la leit ban rat ïa ka Bolero kaba ki shong haduh ban da pra hi phum bad kitei ki arngut ki Rangbah ki la khlad ha shen bad uwei u la mynsaw. Katkum ka jingioh lum jingtip, la iathuh ba u Smart Sangma ba la khlad ha katei ka jingjia u dei u Driver jong ka tnad District Agriculture Ophisar, Resubelpara u Bah Victor Kharbuhki uba la kiew lang ha katei ka Bolero ban leit shaw ïa utei u Ophisar.

Mar ïa ioh jingtip ia katei ka jingjia, kitei ki ar ngut ki ophisar naduh ka kong Linza Fenny Syiem DSO Resubelpara bad u bah Victor Kharbuhki DAO Resubelpara kila ia poi naduh hynnin ka janmiet ban ïakren ïa ki Pulit bad ki doctor lem bad ki ba haiing hasem jong kitei ki ar ngut. Na ka liang u Mukul Sangma, u Leader of Opposition uba dei ruh u MLA ka Ampati, ula pynpaw ia ka jingsngewsih halor ka jingduh noh ïa ka mynsiem jong ki ar ngut ki Rangbah bad ha kajuh kapor u pynpaw ruh ia ka jingsngewkhia halor ka jingnangjur ki kam aksident ha ki surokbah tang namar ka Nongniah khlem akor ki Driver kiba don hapdeng ka jingbuaid kyiad.