Sahkut T.23 klur ka pisa MGNREGA ha WKH, shem jingeh ban pyndep Project thymmai

Ka kynhun West Khasi Hills District Village Employment Council Association (WKHDVECA) hynne ka sngi ka la kynduh ia u Myntri ka tnat C&RD u AT Mondal bad dawa ban tuklar halor ka jingsahkut ka pisa palat T.23 klur ba la dep pyntrei jong ka skhim MGNREGA ha West Khasi Hills. Ia WKHDVECA la synran lang da u MLA ka Rambrai-Jyrngam constituency u RG Momin bad u MDC ka KHADC Bah Lurshai Kharbani. Ka WKHDVECA ka la pynsngew hakhmat u Myntri ia ki jingeh jong ki nongdie tiar jingtei, ki nongkitkam ki VEC,  namar ka jingslem ban siew ia ka bill bai tiar ba da ki snem, kaba la pyntroin ia kine ki nongdie tiar namar ka ram bai tiar ba kynthup naduh ki maw, ki shyiap,ki dewbilat bad kiwei kiwei. Ka la pynpaw ba kine ki nongdie tiar kim lah shuh ban kyrshan, kaba la wanrah ia ka jingeh ban pyndep ia ki project bapher bapher hapoh ki shnong.

Ka kynhun ka pyntip ba ka pisa ba sahkut tang hapoh WKH, kaba don 5 tylli ki C&RD Block kynthup ki Block ba thymmai, ka la poi sha ka T.23 klur tam haduh mynta. La pyntip ba ha ka jingiakren, u Myntri ulapynshai ba ka jingslem ban pyllait ia ka pisa sha ki District bad sha ki Block, ka dei na ka daw ka jingpynslem jong ka Sorkar Pdeng. Ka kynhun kala pynsngew ruh halor ki jingeh jong ki job card holder namar ka jinghap ban shon dur arsien shisngi khnang ban lah pynrung ia ka jingwan trei jong ki ban ioh ia ka bai bylla. Kala kdew ruh ia ka jingeh ki VEC namar ka daw ka jing bym don ia ki mobile kiba biang, ka jingbym biang ka network, ka jingbym treikam thikna ka NMMS Application bad kiwei kiwei.

Ka kynhun kala pynsngew ruh halor ka jingrit palat ka bai bylla ba ju siew sha ki jobcard holder kaba long tang T.272 shisngi ia ki Kynthei bad Shynrang. Kala kyrpad ia u Myntri ba un tuklar ha kaban pynkiew noh ia ka bai kylla kat kum ka jingiaid ka por bad ban pyniahap kat kum ka bai bylla bala buh. Ka Association ka la kyrpad ruh ia u Myntri ban kham ai lad ban nym buh pyrkhing eh ia ki jingtrei ba ki paidbah ki donkam ha ki shnong Permissible Work), namar ba ki la bun palat ki jingteh kyndon khnang ba kin lah ban trei ia shibun ki jingdonkam ha ki shnong kum ka kynroh bad kiwei kiwei de.