Sam khusnam ka Riti Academy u Lat ia ki 5 ngut

Ka Riti Academy Sngi ai nam Khusnam sha ki samla jong ka jylla ka la long ha paki dulan jong u Lat ha ka ba san ngut ki khlur donnam ki la ioh pdiang ia ki khusnam na u kongsan, C H Vijayashankar, Lat ka jylla Meghalaya ha ka ia don rymgkat u Bah F R Kharkongor, IAS, Principal Secretary, Arts and Culture bad Dr B D R Tiwari, IAS, Commisioner and Secretary to the Governor. Ha ka ba ia syllok bad ki khlur donnam u Lat u la iaroh ia ki kam jong ka Riti Academy na ka bynta ban pynkup burom ia ki samla ka jylla ki ba tbit ha la ka sap ka phong, khnang ba kin ioh mynsiem ban dang iaineh ha la ka kam ba ki tbit.

Kumta u la maham ba ki kam sniew kum u kani (drugs) ka shongkha khynnah bad ka jingpang awria (HIV) ki ba la kynrei ha ka imlang sahlang dei ban pynduh pyndam da ki kam babha ban kyntiew ia ki samla ha la ki sap ki phong, khang ba kin lah ban kiar na ki kam sniew.Ki khlur donnam ki la la ioh khusnam na u Lat ki long u Dr Mebanlamphang Lyngdoh da ka Khusnam Rana Kharkongor na ka bynta ka sur rwai surtem bad ka thoh ka tar, Rangkitbok C Dohkrut da ka Khusnam S Quotient Sumer na ka bynta ka thoh ka tar, Kyrmenlang Uriah da ka Khusnam Sumar Sing Sawian na ka bynta ka pathai khubor, Ram Kymjin da ka Khusnam Prithpal Sing Sehdeve na ka bynta ka shtahdur bad Ricky Paul Marwein da ka Khusnam Crystal Gayle Kharnaior na ka bynta ka thohdur saiñkor (Digital Arts).Ha ka jingkren lamphrang, u Bah Raphael Warjri u la sdang da ka ba pyrto ia u synñiang jong ki khlur ba la khlad noh ki ba la pyrsad mynsiem bad pynshlur ia ki samla ha ka lawei kum u Bah S Quotient Sumer, Sumar Sing Sawian, Prithpal Singh Sehdave, Rana Kharkongor bad ka samla Crystal Gayle Kharnaior (bam kwai ha dwar U Blei) ki ba la tyngshaiñ ha la ka kam.

Nangta u la ainguh kyntiewnam ruh ia u lat ba la khlad noh dang shen u Satyapal Malik u ba la sam ia ka Khusnam Khliehduh ha Jylla (State Award) sha u Bah Raphael Warjri ha u snem 2021 ka ba lyngkhuh artat bad ka lyngkhuh laiphewsnem jong ka synjuk ki barikor Khasi, Riti Academy ha ka ba u lat Satyapal Malik u la kynpham ba ka sorkar ka dei ban kyrshan borbah ia ki kam bakhraw jong ka Riti Academy. U Bah Raphael Warjri u la nam ruh ia ki kam thohdur ba la iohlad na ka sorkar kum ka ba tei ia u motdur jong u Tirot Sing Syiem ha nongbah Shillong ka jylla Meghalaya, ha Dhaka, Bangladesh.bad dang shen u motdur bajrong tam ha jylla ba phah ka HYC ba la tei ha Laitarted, Nongthliew bad kiwei kiwei ki jyntei donnam ha jylla. La pynpaw ruh ka jingsngewnguh ia u Lat ka jylla C H Vijayashankar na ka bynta ka song pisa ba la kular ban ainam sha baroh ki khlur donnam ki ba la iohpdiang ia ki khusnam. La pynphuh pynphieng ia ka jingrakhe sam khusnam da ka jingrwai ainguh da ka Dalariti G Kharnaior ia la ka hynmen Crystal Gayle, ka ba dei artat ka sngi lynkhuh snem sngiiap ba phra mynta u snem.