Samla ngi dei ban ia tylli, ka sorkar ka sympat ia ki paradoh:KSU

Ka Khasi Students Union (KSU) Laban hynne ka sngi ka la rakhe ia ka jingdap 30 snem ne ka ‘Pearl Jubilee Celebration’ ha Bharat Scouts & Guides Hall, Laban. Ha kane ka jingrakhe ka seng ka la pynthymmai ruh ia ki nongkitkam na bynta ka samoi treikam jong u snem 2025-28 bad ka la sam ruh ia ki khusnam sha ki samla pule bad sha ki nongialehkai ka jylla. Kum shi bynta ha ka jingrakhe, ka seng ka la ioh ruh ban pyllait paidbah ia ka kot Magazine u mawmer ba 30 bad ka jingrwai ka circle Shaei ki Akhia.

U President rangbah ka KSU u bah Lambokstar Marngar haba kren ha kane ka sngi, ula ai mynsiem ia ki samla ka seng kiba la lah ban iaid lynti ban noh synniang ban ai ka jingshakri sha ki paidbah ha kine ki 30 snem. U bah Marngar ula ong ba ka seng ka ju ioh sngew ia ki jingud jingnam jong ki paidbah ha kine ki khyndiat sngi bad ula kyntu ia ki samla ka seng ba ki dei ban peitngor bha ia ki jingeh jong ki paidbah. Ula ong ba ha kine ki khyndiat taiew ka sorkar ka la pynsawa ia ki sur jingput jingtem, hynrei ha ki khyndiat sngi ka la pynjaw ummat ia ki longkmie ha khyndai lad. Ula ther ia kane ka sorkar da kaba ong ‘ka juh ka sorkar kaba pynsngewbha ia ki samla bad kajuh ka sorkar hi ka sorkar kaba pynsympat ia ki juh ki para doh parasnam’.

Ula kyntu ia ki samla ba ki dei ban iatylli bad kyrsiew thiah ia kiwei kiba ioh thiah bad la kyrpad ia ki ba ki dei ban bud ia ki synniang ba la noh da ki nongialam barim ha ka imlang sahlang. Katba na ka liang u Chairman ka NESO u bah Samuel Jyrwa ula iaroh ia ka KSU Laban circle kaba dei kawei na ka circle ha ka seng, kaba khlain bha bad kaba treikam bha. Ula kyntu ia ki nongkitkam ba thymmai ba ki dei ban trei shitom ban pyntyllun shakhmat ia ki kam ba dang sahteng.