Sar ka BJP ha ka ilekshon ha Bihar, jan jah kyrteng ka Congress

Ka kynhun jong ka National Democratic Alliance (NDA) ka la khur ia ka jingjop da 202 ngut ha ka iing Dorbar Thawain ba don 243 ngut ki dkhot ha jylla Bihar, katba ka Congress ka la jan jah kyrteng bad ka jop tang 6 ngut ki MLA, kane ka long katkum ka resol ilekshon MLA ba la pynbna mynta ka sngi Thohdieng.Ki seng sain pyrthei ba don hapoh ka kynhun NDA ki kynthup ia ka Bharatiya Janata Party (BJP), ka Janata Dal (United) (JDU), ka Lok Janshakti Party, ka Hindustani Awam Morcha bad ka Rashtriya Lok Morcha kiba ka khur ia ka jingjop don burom.

Ka kynun ki seng saiñ pyrthei hapoh ka NDA ki la pynkhreh ban thaw sorkar thymmai hapoh ka jingialam u Nitish Kumar na ka JDU bad ka shong ha ki nongialam ka BJP bad JDU ba jied ia u nongialam.Haduh ba thoh ia kane ka khubor ka BJP ka jop 82 seat bad ka dang tam 7 seat, ka Janata Dal (United)-JD (U) ka jop 72 bad ka dang tam 13 tylli, katba ka Rashtriya Janata Dal (RJD) ka la jop 22 ngut bad ka dang tam 3 ngut ka jingniew vote.Ka Lok Janshakti Party (Ram Vilas) LJ-PRV ka la jop ha ki 17 tylli ki constituency bad tam dang 2 tylli, ka Indian National Congress (INC) ka la jop ha ki 6 tylli ki constituency.

Katba ka All India Majlis-E-Ittehadul Muslimeen (AIMIM) ka Hindustani Awam Morcha (Secular) HAMS ki la jop mar 5 ngut.Ka Rashtriya Lok Morcha ka la jop 3, ka Communist Party of India (Marxist-Leninist) (Liberation) CPI (ML) (L) ka la jop 2, ka Communist Party of India (Marxist) – CPI(M) ka la jop iwei.Katba ka Indian Inclusive Party (IIP) bad ka Bahujan Samaj Party (BSP) ki la jah kyrteng ha kane ka ilekshon.Katkum ka Elction Commission India (ECI) na ki 243 tylli ki constituency ha Bihar la dep niew vote ha ki 215 tylli ki constituency, katba ha ki 28 ki constituency ka jingniew vote ka dang iaid shakhmat.