Sdang ka Congress ïa ka SSA ha Nongstoin ban pynkhlaiñ ïa ka rukom treikam ha WKH

Kum shibynta ban pynkhlaiñ ïa ka rukom treikam jong ka Indian National Congress (INC), ka Party ka la pyllait paidbah ïa ka prokram ba la tip kum ka Sangathan Srijan Abhiyan ha baroh kawei ka Ri India. Ïa kane ka prokram la pynlong ha Nongstoiñ lyngba ka jingwan poi jong u Sachin Naik, u Observer na ka All India Congress Committee (AICC).

U Sachin Naik uba dei ruh u Secretary barim ka AICC bad uba long mynta kum u Senior Vice President ka Maharashtra Pradesh Congress Committee, ula wanpoi ha Congress Bhavan Nongstoiñ, West Khasi Hills District (WKHD), ban peit bad pyntreikam ïa kane ka prokram.

Haba kren sha ki lad pathai khubor, ula ong ba ka jingwan jong u sha Nongstoiñ bad WKHD ka long ban pyntyllun ïa ka jingpynthymmai ïa ka rukom treikam jong ka Party, kaba kynthup ïa ka jingthung bad jingjied thymmai ïa ki District President.

U la ong ruh ba ka AICC ka la dep ban pynlong kum kane ka jingpynthymmai ha kiwei pat ki jylla jong ka Ri India. Kum u Observer un sah ha WKHD haduh 7 sngi, ha kaba un leit jurip sha manla ki Block bad iakynduh ïa ki nongtrei ka Party ban sngap ïa ki jingsngew bad jingai jingmut jong ki, khnang ba ka jingjied ïa u District President kan long kaba khuid, kaba shai bad kaba iaid beit iaid ryntih.

Hadien ba la dep ban bishar bniah ïa baroh ki bynta, un sa phah ïa ka kaiphod sha ka AICC, kaba yn sa pynbna paidbah ïa u District President jong manla ki District. Kane ka sienjam ka long ban pyntikna ba u District President uba thymmai un long u ba lah ban peit bad pyniaid ïa ki kam jong ki Block bad ban shim ïa ki rai kiba kongsan halor ki kam jong ka Party, ki kam election bad kiwei kiwei de.