Sdang ka sorkar ia ka jingtih dewiong ‘Scientific Mining’ banyngkong ha Byndihati

U Myntri Rangbah ka jylla u Conrad K Sangma hynne ka sngi ula plie ia ka sngi ia ka Scientific Mining Coal Block ne ka jingtih dewiong katkum ka juk stad saian lyngba ka Video Conferencing banyngkong ha jylla ha ‘Saryngkham-A’ Coal Mine, Byndihati ha East Jaintia Hills District. Ha ka jingialang u Myntri ka Sorkar Jylla u Bah Kyrmen Shylla, ka MLA ka Sutnga-Saipung ka Kong Santa Mary Shylla, u Executive Member ka Jaintia Hills Autonomous District Council (JHADC) u Bah Hambertus Nongtdu, u Deputy Commissioner ka East Jaintia Hills District u Shivansh Awasthi, u Superintendent of Police ka district u Giri Prasad bad ki paidbah ka thain. Haba ai jingkren u Conrad K Sangma ula ai khublei ia baroh kiba don bynta ha ka kam kynthup ia ki ophisar, ki trai par, ba aplai ia ka lease, u trai ka par dewiong u Bah Dapmain Shylla na Byndihati, halor ka jingnoh synniang ba sdang ia ka scientific mining ha ka jylla.

Ula ong, ha ki 11 snem ki la buh jingeh ba khraw ia kiba bun ki nongshong shnong jong ka jylla khamtam eh ia kito ba don bynta bad ka kam tih dewiong kiba la iakynduh jingeh ha ka kamai kajih. U Conrad ula pynkynmaw, ha u snem 2018 haba ula shimti kum u Myntri Rangbah ka Jylla ha ka sien banyngkong eh, ka kam tih dewiong ka dei ka mat ba la buh hakhmat da ka sorkar bad lyngba ka jingtrei shitom ha ki 6-7 snem ka la seisoh lyngba ka jingioh ban sdang ia ka Scientific Mining Coal Block banyngkong ha ka jylla. Ula ong ba “Ka jingiaid lynti kam shym la long kaba suk ne kaba shai kdar. Ha ka jingshisha, kala long kum ka jingiaid ha ka jaka ia kaba ym lah ban tip ia ki jingeh kiba kumno yn iatyngkhuh, katba ngi dang iaid shakhmat, hynrei kaei kaba pynlong ia ngi ban iaid shakhmat ka long ban iohi ba ia ki jingeh kaba ki paidbah kila mad, ngi dei ban wad ia ki lad ki lynti ban pynbeit noh ia ki bad ban wanrah biang ia ka jinglong jingman kaba bang na ka bynta ki paidbah bad ki nongshong shnong”.

 U Conrad ula ong, ba ka jingpyniaid ia ki kam kaba kiwei pat kiba aplai ban ioh jingbit ban tih dewiong bad ba kin lah ban sdang noh ia ka jingtih dewiong katkum ka jingstad saian ka dang iaid. Ula ong ba ka long kaba eh na ka bynta kito kiba nyngkong, baar ne balai namar ba ki iaid shakhmat ha ka jaka kaba kim pat ju tip bad kiei ki jait jingeh kiba lah ban mih kaban pynslem ia ki kam ki jam, hynrei mynta haba la don pat kiban iaid shakhmat bad yn iohi baroh kiei kiei, kumta kan kham suk pat ia kiwei kiba don nadien ba kin iaid shakhmat namar la don lypa kiba pyni lynti ia ki. U Conrad Sangma ula ong ruh, ba da kane ka jingplie ia ka jingtih dewiong kaba nyngkong lyngba ka jingstad saian, ha ki snem kiban wan kin dang bun kiban sa bud lang bad ka sorkar ka pynshlur ia kiwei ruh ba kin aplai khnang ba kane ka rukom treikam kan long kaba biang kumba ju long.