Sha ki 242 ngut sam Scholarship ka WJSU, ban jur u Bah Hima ia ka jingdonkam ki Competitive Exam

Hadien ba ka seng War Jaiñtia Student Union ka la iaid lynti 10 bnai lynter ban pynkhreh ia ka Scholarship na ka bynta ki khynnah skul ka thaiñ Amlarem ba tip kum ka 1st War Jaiñtia Scholarship Examination 2024, kynthup naduh ban iamir jingmut bad ki bor ka tnat pule puthi Sub-Divisional School Education Officer, Amlarem, ki nonghikai skul ka thaiñ, ki bor shnong bad kiwei, kumjuh naduh ban pynlong ki competitive exam, kane ka sienjam jong ka seng kala long jop namar haka 21 tarik mynta u bnai kala ioh ban sam iaki Scholarship shaki 242 ngut ki khynnah skul bala pass iaka competitive exam. Ha ka jingialang sam scholarship bala pynlong  ha Enowell Hall Amlarem u H.M.Shangpliang u nongai buit ka tnat pule puthi ka sorkar Jylla uba dei ruh u MLA barim ka Mawsynram ula long kum u kongsan, u MLA barim ka Amlarem u Stephanson Mukhim kum u symbud kongsan, u G.L.C. Mylliem BDO, Amlarem, u Katdoh Rymbui u heh pulit bala shong thait, u waheh shnong Amlarem u Kampher Pohlong, ki nonghikai, ki khynnah skul, kiba shah khot sngewbha bad kiwei. U General Secretary ka WJSU u Everest Langstang  u iathuh ba ka jingjop kane ka project jong ka seng dei  lyngba ka jingkyrshan lang ki bor sorkar, ki riew shimet, ka ICFAI University, ka MIT University, Star Cement, ki bor shnong, ki skul hapoh ka thaiñ Amlarem bad  kiwei kiba  la iarap kyrshan haki rukom bapher bapher.

U pyntip ruh  ba napdeng  ki 750  ngut kiba iakhun, 242 ngut kiba pass, bad napdeng kine la jied iaki Top 10, Top 20 bad General. Kiba ioh nyngkong haka kyrdan Top-10, ki ioh 4000 tyngka, kiba wan ba ar ter ter pat ki ioh mar 2500 tyngka. Kiba rung haka kyrdan Top-20 ki ioh 1500 tyngka, ha ka General pat mar 1000 tyngka. Bad ka scholarship ba la sam baroh ka la kot shaka 3,12400 tyngka. U ong ruh kumba ka seng hi ka don iaka thong ban pynkiew iaka pule puthi lyngba kane ka Scholarship da kaba pynlong competitive exam, u khmih lynti ba nangne shakhmat ruh kin dang bteng shuh shuh iaka, bad haki snem ba shakhmat kin sa mih ruh ki heh ophisar haki laiñ bapher. U kongsan H.M.Shangpliang haba kren u ong, ka competitive exam dei kaba donkam bha iaki khynnah skul namar ka plie lad iaki ban tip ia kiei kiei ba don sawdong jong ki ym tang ban  pule  lyndet beit iaki kot skul ba ki buh hakhmat jong ki.  Bad ha ka jingiohi jong u bunsien  ki khynnah skul jong ngi hadien bala pass klas X, la don ka jingdawa ha ïing ban wad kam, kumta haba ki pyrshang leit thoh exam kim  juh kham lah jubab iaki jingkylli general knowledge.

Halor kane ka nongrim u pyntip ba naka liang ka sorkar Jylla ruh naduh u snem ban wan, haka subject social science kan pynrung kham bun shuh shuh ki lynnong  haka, ki ban ai shibun ki jingtip kyllum ne (General Knowledge) khnang ban  myntoi bad ioh jingtip bha ki khynnah skul ia kiei kiei ba don sawdong. Nangta ula kdew ruh halor ka jingwanrah iaka NCERT Book da kaba ong wym dei ban  kheiñ poh ia kane ka kot namar  haka lah ban ioh shibun ki jingtip ba donkam. Kine baroh ba leh ka sorkar kumjuh ba leh ka WJSU da kaba pynlong competitive exam shwa ban ai scholarship ruh u ong dei ba jingpyrkhat iaka lawei ba bha ki khynnah skul, khnang ban long kiba pynkhreh lypa ialade naka bynta ban iakhun ia kino kino ki jait jingiakop haki por ban wan la haka jingiadei ban thoh exam iakhun kam, iakhun ki laiñ pule bad  kiwei. Ym ban mih madan pat hadien ban dawa bym iohkam ba wan da kiba nabar. Kumta dei ban long kiba la pynkhreh namar um kwah ban iohi ia kata. Ha kane ka juh ka sngi u kyntu ruh iaki khynnah skul ba kim dei ban shah ialam bakla haki mobile phone, ban ngop haka jingdih pynbuaid bapher, hynrei dei ban iaid haka lynti ba bha khnang ban kiew ka  longbriew manbriew. Ula pynkut da kaba ong phohsniew ia kiei kiei kiba heh, bad long kiba trei shitom nalor ban  ngeit ban shaniah ruh halade khnang ban jop haka jingim.