Shah bat ki kali tourist na Meghalaya ha Jorabat

Hadien ka jingshah bat ki kali Meghalaya ha Jorabad bad Khanapara Ri-bhoi District, ka All Khasi Meghalaya Tourist Taxi Association (AKMTTA) hynne ka sngi ka la rai ban weng noh ia ka jingiakhih ba la sdang naduh 16 Nailur 2025. Kane ka jingweng noh ka AKMTTA ia ka jingiakhih ka dei hadien ba ka Deputy Commissioner (DC) East Khasi Hills ka la lum kyrkieh ia ka jingialang hadien ba la mih ka kynrum kynram namar ka jingshah bat ki kali Meghalaya Jorabad bad Khanapara Ri-bhoi District. Lah ban kdew ba ha kine ar sngi ka AKMTTA ka la sdang ia ka jingiakhih da ka ba sam kot lyngkdot ia ki kali Tourist na Assam ban kyntu ia ki ruh ba kim dei ban kamai sha ki jaka jngohkai pyrthei kiba don hapoh Meghalaya.

Kane ka jingleh ka AKMTTA ka la pynbor ia ka Association na Assam ban bat sa ia ki kali Meghalaya da ka ba khanglad ia ki ban leit sha ki thain jong katei ka Jylla. Haba kren sha ki lad pathai khubor u Spokesperson ka AKMTTA u Bah Balajied Jyrwa ula ong, ba hadien ki Bor District ki la kular ban lum ka jingialang bad ka Sorkar ha ka 23 tarik Nailur, ka Association ruh ka la rai ban weng shwa ia ka jingiakhih ban iathir sani bha halor ka jingdawa jong ki. U Bah Balajied u la iathuh ha ka 23 tarik kan don jingialang hapdeng ka Association, ka tnat kam pohiing, ka tnat Tourism bad ka Ophis u Myntri Rangbah ka Jylla halor ka jingdawa jong ka AKMTTA. “Hadien ka jingialang ha ka 23 tarik ngin sa shim pat ia ka rai, la ngin bteng ne weng noh syndon ia ka jingiakhih hynrei mynta ka kynti ngi la rai ban sangeh shwa ia kane ka jingiakhih” la ong u Bah Balajied.

Haba batai halor ka jingiakhih ka AKMTTA u Bah Balajied ula ong ba ki dkhot ka Association kim ktah ia ki kali Assam ne ia ki nongwan shangkai pyrthei. Ula ong ba kaei kaba la jia ha Jorabad bad Khanapara ka dei hi namar don kiba rah khubor thok ba ki kali na Assam ki shah bat ha ki dkhot ka Association. “Lada phi leit peit ha ki jaka ieng kali, mynta ruh phin iohi ki kali Assam ki kit briew. Ka jingpynsngewthuh jong ngi ia ki dribar kali Assam ka dei ba ki donkam ban sangeh ha ki jaka ba la ithuh bad nangto ia ki briew yn ialam da ki kali trai Jylla sha kylleng ki jaka jngohkai pyrthei” ula ong.