Shah kem 3 ngut snar nongtuh thuk thuk

Ki Pulit ka East Khasi Hills ha ka step sngi Saitjain ki la ioh kem ia 3 ngut ba la suba ki dei ki nongtuh thuk thuk. U Superinitendent of Police ka East Khasi Hills u Bah Vivek Syiem, ula pyntip ba ki pulit jong ka Sadar Police Station katba ki dang iaid pahara ha ka por 4:50 baje mynstep, ki la iakynduh ia lai ngut ki briew ba wan da kawei ka kali kamai Swift ba don u nombar ML04-C-7163 ha Keating Road bad ki dang pyrshang ban tuh ia ka Scooty kaba don u nombar ML05-AC-8352 da kaba ot ia u waiar ban pyniaid ia ka Engine.

La iathuh ba kane ka kynhun ki Pulit ka la ioh kem shuwa ia u nongniah jong kane ka Swift uba la tip kyrteng kum u Ribellang Phyllei 25 snem ka rta na ka shnong Biar, Laskein Block, WJH katba ar ngut ki la ioh ban phet krad ha ka jingdum ka miet. U Bah Vivek ula iathuh ki Pulit ka Mawryngkneng ki la ioh bat ia ki ar ngut kiwei pat ha ka jaka khynra kali bad kine ba la shah kem ki kynthup ia u Empyrkhat Dhar 21 snem na ka shnong Saphai bad u Steven Syngkon 19 snem na Iaw Thymme WJH katba ki dang thmu ban phet krad sha West Jaintia Hills.

U SP ula pyntip ba ki pulit ki la ioh ban kurup ar tylli ki Helmet, artylli ki bilor umphniang petrol, artylli ki screw driver, shi thup ki Spanner, kawei ka Allen Wrench, uwei u T- Hand Hex key, uwei u T- Handle Torx Key, ka pisa T. 6100 bad 3 tylli ki mobile phone. Ula iathuh ba ki Pulit ki la rejistar kes ia kine ki 3 ngut ki briew hapoh ka kyndon 305(b)/324(4)/111(2)(b)/3(5) jong ka BNS bad ka jingtohkit mynta ka dang iaid shakhmat.