Shah kem 4 ngut ki nongtuh thuk thuk na Mookyndur

Ki Pulit ka Mawryngkneng, hynin ka miet kila ioh kem ia ki 4 ngut ki nongtuh thuk thuk bad kali kaba kynthup ruh ia ka jingdonkti lang jong ki arngut ki khynnah kiba dang rit ha ka rta. Katkum ka kyrwoh na u SP ka East Khasi Hills u Bah Vivek Syiem ula pyntip ba haka miet jong ka 13 tarik u Risaw, katba ki pulit jong ka Mawryngkneng ki dnag pynlong ia ka jingkhmih bniah ia ki nongniah ia ki thuk thuk ha Kynroh Maram, kawei ka thuk thuk kaba la pynher sted bha ha ka por 10:30 mynmiet kala kyntait ban sangeh ha katei ka jaka.

Kumta ki pulit kila beh thong bad ha ka por  10:45 mynmiet katei ka thuk thuk kaba dei ka Royal Enfield kaba don ia u registration number (AS01-FY-0871) la shem ba la shu ieh ha ka shnong Mookyndur, West Jaintia Hills. U SP ula pyntip ba ki pulit kila pynlong ia ka jingwad bad 4 ngut ki briew kila shah kem ki kynthup ia u Kleston Gympad 32 snem ka rta bad u Behelden Khyriem 20 snem ka rta lem bad arngut ki Khynnah kiba dang ha ka rta, kiba na ka shnong Amlari Model, West Jaintia Hills kiba dei ki nongpdiang ia ka thuk thuk kaba la tuh.

Ki pulit kila kurup noh ia kawei ka kali Tourist Maruti Alto kaba don ia u registration number ML04 D 4797 bad kawei ka thuk thuk Royal Enfield bad la suba jur ba ia kane ka thuk thuk la tuh na Guwahati Pan Bazar bad ki pulit jong ka Guwahati Police kin sa wan ban shimti noh ia kine kiba donkti ha ka kam tuh.