Shah kem kiba pynkulmar ha Polo, mynsaw u samla ba shah dung tari

U Superintendent of Police (SP) City u Bah Herberth Kharkongor ula pyntip ba hynnin ka miet, uwei u samla shynrang ula mynsaw na ka jingshah dung da ka tari na ka jinghuri hura kaba la jia ha kawei ka longiing kaba don ha Mawlai.

 Haba iakren bad ki nongthoh khubor hynne ka sngi, u SP City ula ong ba katei ka jinghuri hura ka la jia hapdeng jong ki shiiing bad ka la sdang ha ka por mynstep da ka jingiashoh, ia kaba ki pulit kim shym la ioh jingtip eiei bad dei ha ka por mynmiet ba ki pulit ki la ioh ia ka jingtip ba ka la don ka jingiashoh kumta uwei u ophisar ka Mawlai Police Station ula leit ban tem ia kane ka jingiashoh bad ula lap ba uwei u samla uba la tip kyrteng kum u Khrawbok Khongsit uba la don 24 snem ka rta ula mynsaw na ka kti ka jong u.

 U SP ula iathuh ba katei ka jingjia ka la jia ha ka shnong Mawlai Nongmali bad ki pulit ki la dep ban rejistar case ia kane ka jingjia bad ka jingtohkit ka dang iaid shakhmat bad haduh mynta kim pat ioh kem iano iano ruh ne ban tip ia ka daw tynrai jong katei ka jingjia. Ha kawei pat ka liang, u Bah Herbrth Kharkongor ula iathuh ruh ba ka la don ruh ka jinghuri hura ha ka thain Polo, ha kaba ki pulit ki la leit ban tem mardor ia kane ka jinghuri hura.

Ula ong ba katei ka jinghuri hura ka la mih na ka jingiania hapdeng ka jong ki bad ki la sdang ban ia khluid hynrei ha kane ka jingjia ym shim la don mano mano ba mynsaw bad ki pulit ki la rah noh ia ki briew kiba donkti ban pynkulmar bad mynta ki dang pynlong ia ka jingtohkit pyrshah ia ki.