Shah kem u Rangbah ba suba donkti thang Iingmane ha Pomlahier

Ki pulit ka Mawryngkneng hynne ka sngi ki la ioh kem uwei u rangbah ba suba donkti wiang diang ia ka iingmane jong ka Balang Presbyterian ha Pomlahier, East Khasi Hills. U Superintendent ki pulit East Khasi Hills, u Bah Vivek Syiem, ula pyntip ba ki pulit ka Mawryngkneng Police Station ha ka 16 tarik u Nailar ki la ioh pdiang ia ka ejahar ba la ujor da ki nongialam ka Balang Presbyterian Pomlahier ba ha ka por 2 baje mynstep 15 tarik Nailar, ba don ki runar ba wiang ding ia ka iingmane ha kaba ki dieng, ki shuki plastik bad ka madan ba siang da ki dieng ka la julor lut.

Kumta halor kane ka jingjia, ki pulit ki la rejistar ia ka case 34(08)2025 U/S 326 (g) BNS ha Mawryngkneng P.S bad ha ka jingtohkit la shem ba kane ka jingjia ka dei kaba la jia ha ka sien ka baar kaba la suba ba ka dei kaba la donkti da u Bah Balajied Kharsati. U SP ula pyntip ha ka 11 tarik u Nailur, la ioh jingtip ba la don u nongkawang maw ia ka jingkhang iit ka iingmane haduh ba pait ki iit bad ha ka jingtohkit, la ioh jingtip ba u Bah Bajiedstar Kharsati 47 snem ula pynpait ia ka jingkhang iit, hynrei namar ka jingsheptieng ioh shah shoh ha ki paidbah kumta ula phet noh sha khlaw.

Ki pulit ka Mawryngkneng ki la leit wad ha katei ka khlaw bad ki la ioh kem ia une u rangbah hynne ka sngi bad ki la ialam noh ia u sha Mawryngkneng CHC ban khmih bniah ia ka jinglong jingman ha ka koit ka khiah. Namar la paw ba une u rangbah ym biang ha ka rukom pyrkhat pyrdain ne don ka jingktah khlieh, kumta la ialam noh ia u sha MIMHANS bad mynta u don hapdeng ka jingshah sumar ha katei ka hospital.