Shah kem u trai ka GM Coke Byrnihat bym siew ïa ka khajna ba T. 150 klur

Ka Directorate General of GST Intelligence (DGGI), Guwahati Zonal Unit, Meghalaya, ka la kem ïa u hehspah nongkhaïi uba dei u trai jong ka GM Coke Byrnihat, u Shiv Kumar Mittal, halor ka jingkynnoh ba u la phet rieh khlem siew satia ïa ka khajna kaba la kot palat T. 150 klur. La kem ïa u Mittal na Tinsukia ha Assam ha ka janmiet Sngisaitjain hadien ba bun taiew ka jingtohkit halor ki kam bamsap kiar ban siew khajna ha ki jingkhaii pynmih coke. Ki bor pynïaid ki kynnoh ba u la ïoh ban seng karkhna pynmih khaïi coke na ki katto katne ki karkhana be-ain ha Meghalaya bad u la pyniaid ia ki kam khaïi lyngba ki invoice leh thok ba la pynmih ha ka kyrteng jong ki dummy firm ki karkhna rngai bym don kyrteng. La ïathuh ba bun na kine ki kompeni la thaw da kaba pyndonkam ia ki jingithuh ha ka kyrteng jong ki briew na ki longïing kiba duk.

Katkum ka jingong jong ki nongtohkit, la kynnoh ba u Mittal u la pyndonkam ia ki invoice kiba shongdor palat 150 klur tyngka, da kaba buhrieh ia ki jingpyniaid ba shisha bad lait na ki jingkitkhlieh khajna kiba heh. Ka jingkem ia u, ka long hadien ka jingkhynra kaba kham mynshwa ha Guwahati mynta u bnai, ha kaba la kem ia saw ngut ki briew, namar ka jingdonkti jong ki, ha ka kynhun shna invoice thok kaba heh bha. Ki jingtohkit kiba hadien ki la pynpaw ïa ka jingïadei ba beit jong u Mittal bad ka raket kaba kham heh kaba ktah ïa ka thaiñ Shatei Lam Mihngi.

Ki heh sorkar ki la pynthikna ba u Mittal u dang don mynta hapoh ka jingtohkit ban wad ia ka jingiadei kaba kham heh jong ka jingkhaii be-ain ia u dewiong bad jingkhaii pynmih coke bad ban ithuh ia kiwei pat ki nongioh jingmyntoi. Ka DGGI ka la pynjur ïa ka jingtreikam jong ka pyrshah ïa ka jingpynbna thok, ka jingphet khajna, bad ki lad khaii be-aiñ, ha kaba ïa ka jingkem ïa u Mittal la ïohi kum kawei pat ka sienjam kaba kongsan ha kaba pynduh pyndam ïa ki kam thok khajna ba la pynbeit ha ka thaiñ.