Shah ktah 25 ki shnong na ka jingther u slap Iap 2 ngut ba twa khyndew, julor 18 ki iing bad twa surok

Ar ngut ki briew ki la duh noh ia la ka jingim namar ka jingwan lynshop ka bor mariang hynne ka sngi Thohdieng bad kine ki jingjia ki la jia ha ki ar tylli ki jaka ba hap ha ka East Khasi Hills district. Ka Tnad Revenue and Disaster Management ka la pyntip ia kane ka jingduh noh ia ki 2 ngut ki mynsiem briew ha ka jingialang ba la lum kyrkieh da u Myntri Rangbah ka jylla u Conrad K Sangma hynne ka sngi. Kine ki 2 ngut kiba la khlad noh ki kynthup ia Klosliya Kharkongor 45 snem ba shong basah ha ka shnong Lumkyntung hapoh jong ka Laitkroh–Khatarshnong Block, bad ka daw jong ka jingkhlad ka dei na ka jingtwa jong ka khyndew. Katba u Samborlang Tariang 35 snem na ka shnong Mawbynna, Pomlakrai ula khlad ba ngam jyllop. Nalor ka jingkhlad jong kine ki arngut, ki la don ruh 3 ngut ki briew ba kynthup ia 2 ngut ki heprit kiba la mynsaw malu mala. Ka sorkar ka la bthah ba dei ban pyllait noh mardor ia ka jingai jingiarap kaba T.4 lak kum ka Ex-Gratia Compensation sha kiba haiing jong kine ki arngut ba la duh noh ia la ka jingim.

U Myntri Rangbah ka jylla ula lum kyrkieh ia ka jingialang bad baroh ki Deputy Commissioner ban khmih bniah ia ka jinglong jingman, ka jingshah pynjulor bad ban peit ba kadei ban don ka jingiatreilang hapdeng ki tnad sorkar bapher bapher kiba donbynta ha ka kam ban ai jingiarap ha ka jylla. U Commissioner and Secretary u Sanjay Goyal, uba la pyntip shaphang ki jingpynkhreh jong ki district bad kumjuh ruh halor ki jingjia jong ka jingwan lynshop ka bor mariang. Da ka jingkhmih, ba ka jinglong jingman jong ka suin bneng kan dang iai bteng haduh ka 31 tarik u Jymmang, u Myntri Rangbah ula bthah ia baroh ki tnad ba kin pynjur ia ka jingkhmih bniah bad ruh ban shim ia ki lad ban ai jingiarap na ka bynta kine ki 24 kynta kiban wan. U Myntri Rangbah ka jylla ula ai ka jingbthah ba ki District kidei ban phiah ha ki Zone ban pynbeit ryntih ia ka rukom ai jingiarap haba wan lynshop ka bor mariang bad baroh ki bor pyniaid district kidei ban long kiba husiar bad kiba peitngor ia ki jaka kiba don jingma bad dei ban ai jingiarap mardor ia ki longiing kiba shah ktah.

Ula bthah ruh ba baroh ki ophisar ki dei ban don ha la ki jaka treikam ha ki Headquarter ki jongki bad la bthah ia ka Meghalaya Energy Corporation Limited (MeECL) ba kadei ban pynbiang mardor ia ka bording elektrik bad ban pynbun iaki nongtrei haba donkam bad ki bor pyniaid district kidei ruh ban shimkhia ban nym don ka jingthud ha ka leit ka wan bad ban pyniar ia ka jingai jingkyrshan ia ki nongleit nongwan kiba sahkut. La pyntip ruh, ba ki la don palat 1,000 ngut ki briew na ki 25 tylli ki shnong ki la shah ktah jur na ka jingsniew jong ka suin bneng kaba la pynmih ia ka jingshlei um, ka jingtwa khyndew bad ka jingshah pynjulor jong ki jingtei. Ka thain East Khasi Hills kadei ka jaka kaba la shah ktah jur bha, 14 tylli ki shnong ki la shah ktah bad kala don ka jingjulor jong ki surok, ki iing bad ki jaka paidbah, ka jingkhyllem ki dieng bad ka jingtwa khyndew ha ki 5 tylli ki jaka. Haba kyllum lang baroh ki jingjia hapoh ka jylla, ki la don 18 tylli ki iing kiba la shah pynjulor ha kylleng ki district ba kynthup ia ka West Garo Hills, South West Garo Hills, East Jaintia Hills, West Jaintia Hills bad Eastern West Khasi Hills.

Nalor kane 6 tylli ki surok, kawei ka skul bad ar tylli ki dukan ki la shah pynjulor ha East Khasi Hills, kawei ka skul ha West Garo Hills, ka jingshah pynjulor ki surok bad ki sainar bording elektrik ha South West Garo Hills. Kala don ruh ka jingshah pynjulor jong ki 6 tylli ki sainar bording (KV Line), 2 tylli ki surok, kawei ka skul bad ka ophis sorkar hapoh East Jaintia Hills bad kala don ka jingtwa khyndew ha ka surok Baghmara–Moheskhola kaba hap ha South Garo Hills. Na ka liang jong ka State Disaster Management Authority (SDMA) bad ka District Disaster Management Authorities (DDMA) ki dang khmih bniah ia ka jinglong jingman bad ki la pynkhreh bad pynbiang ia ki lad ban ai jingshakri bad jingiarap ia ki paidbah nongshong shnong bad kila bthah ruh ia ki paidbah ba kidei ban shim ia ki lad jingiada ban lait na kino kino ki jingjia kiba sngewsih.