Shah ktah ki nongshong shnong ha thaiñ khappud ba khang ia ki Border Hat

U MLA ka Mawsynram constituency u Bah Olan Sing Suin u la ong ba ka jingkhang ki iew haki thaiñ khappud (Border Hat) ki ktah iaka ioh ka kot jong ki nong shong shnong haki thaiñ khappud Meghalaya-Bangladesh. Haba kren shaki lad pathai khubor u Bah Suin u la ïathuh ba ki don palat 15000 ngut ki nong shong shnong haki thaiñ khappud Meghalaya-Bangladesh kiba ioh jingmyntoi naki iew haki thaiñ khappud (Border Hat). U Bah Suin u la ong ba ka jingkhang noh iaki iew haki thaiñ khappud (Border Hat) haki thaiñ khappud kala ktah bha iaka kamai kajih jong ki nong shong shnong kiba iadie iathied ha kine ki Border Hat.

Lah ban kdew ba ki iew haki thaiñ khappud (Border Hat) Meghalaya kila shah khang noh hadien bala sdang ka jingïakynad hapoh Bangladesh kaba la sdang naduh u bnai Naitung 2024 kaba dang neh haduh mynta ka kynti. “Ki nong shong shnong haki thaiñ khappud Meghalaya-Bangladesh ki shah ktah jur naka jingjing shah khang noh ki Border Hat, ka khaïi pateng ruh kala hiar bha haki thaiñ khappud, ngi kyrmen ba ka jinglong jingman ha Bangladesh kan jai jai noh khnang ba ki Border Hat kin sdang treikam biang” la pynpaw u Bah Suin.

U MLA u la pynpaw ba ka jingplie iaki Border Hat kam shong tang haka jingmon jong ka Sorkar Meghalaya ne Sorkar India hynrei ka shong haka jinglong jingman jong ka jinglong shngain ka ri marjan kata ka Bangladesh.