Shah pynkup burom ki 150 ngut ki nongsengkam lajong

U Myntri Rangbah ka Jylla u Conrad K. Sangma hynnin ka sngi, ula pynkup burom ia 150 tylli ki jingsengkam ha ka PRIME Meghalaya Onboarding and Graduation Programme kaba la long ha Ward’s Lake, Shillong.Kane ka jingialang kadei ka jingpyniaid shakhmat ia ki Top 75 Startups ne jingsengkam lajong kiba la shah jied hapoh jong ka Chief Minister’s E-Championship Challenge 6.0 bad ka jingpyndep ia ka Graduation jong ki 75 tylli ki Startups na ka Cohort 5 jong ka prorkam ai jinghikai.

Haba ai jingkren, u Conrad Sangma ula pynpaw ba ka sorkar ka iengskhem ha ka jingkular ha kaba iadei bad ka jingsengkam bad ka khot ia ka kum ka bynta kaba niah shakhmat ban wanrah ia ka jingkylla ha ka ioh ka kot ka jylla bad ula pynshai ba ha ki khyndiat snem kiba la dep, ka Meghalaya kala duna bha ha kaban kyrshan ia ki Startup hynrei mynta ki prokram sengkam kala ioh ia ka jingithuh bad khusnam na ka Sorkar India.

Da kaba ai nuksa ia ka jingshem nalade kum u nongsengkam uba mad ia ka jingeh hashwa ban rung sha ka kam sain pyrthei, u Conrad Sangma ula ong, “Nga iohi ia kajuh ka jingmad ha ki khmat kiba phalang ki jongki. Ka sorkar kan leh ia kaba bha tam eh ban kyrshan ia phi ha ka lynti iaid ha ka jingsengkam” ula ong bad ka maham ba ka jingsengkam kadei ka jingiaid kaba bun bha ka jingdawa.

U Myntri Rangbah ula banjur ruh ba ka jinglong jingman ka ioh ka kot, ka jingpyniaid shakhmat ia ki jingtei, ki prokram kiba iaid da ka mishon bad ka jingpynwandur ia ki polisi kadei kaba la pyniadei bha bad ka jingroi jong ka jingsengkam. Ula banjur ruh ia ka jingkongsan ban ai jingithuh ia ki jingsengkam kiba kyrpang bad kiba tbit lyngba ki sienjam jong ka E-Championship Challenge ban ai mynsiem ban iaid ia ka kolshor ban leh ia kiei kiei kiba long thymmai.

U Conrad ula pyllait paitbah ruh ia ka PRIME Entrepreneur Catalogue, ula sam sam ia ki khusnam ia ki Top Performers ne kiba leh bha ha ka Incubation Programme ha ki kyrdan ki bapher bapher bad la pynkup burom ruh ia ki kito kiba la pyndep ia ka graduate ha ki Startups na ka Cohort 5 bad Cohort 6.