Shah thombor ka shnong Saitsama bad Thadmynri

Hadien ba ka JHADC ka la ioh jingujor ba don ka jingtih maw jingpom dieng ha ki jaka ba thung dieng ka Council ha shnong Saitsama bad shnong Thadmynri, West Jaiñtia Hills District, hynnin ka sngi ka 04/11/2025 ka  Executive Committee ryngkat bad ki ophisar ki la hiar leit jurip ia kine ki jaka. Haba iakren bad u CEM ka JHADC, u Thombor Shiwat mynta ka sngi u iathuh ha Saitsama la lap ba ka don shisha ka jingtih mawleiñ bad dei ba la die da ka shnong Saitsama hi. Haba kylli na u Secretary ka shnong Saitsama ula kam ba kane ka jaka dei jong ka shnong Saitsama, hynrei haba peit  bniah pat katkum ka Map ki lap ba dei ka jaka jong ka Council.

U iathuh ia kane ka jaka la die sha kawei ka Contractor na Assam ban tih mawleiñ, tih shyiap bad pom dieng da kaba ka  pyndonkam ia ka Mining Lease na Assam ym na Meghalaya. U bynrap ba kane dei kaba jia khah khah ha ki jaka ka Council ba don ha khappud. Nangta haba u CEM u kylli  na u Secretary shnong Saitsama balei la die ia kane ka jaka khlem da ioh bor na ka JHADC, u la jubab da kaba ong dei kaba la leh khnang namar ba tlot bor palat ka sorkar Meghalaya. Halor kane ka jingjia la khot hajir ia ka shnong  sha ka Council ha ka 10 tarik mynta u bnai.

Katba ha shnong Thadmynri la lap ba don ka jingtih maw ba la buh shi jaka bad don ruh ka jingkyntur pud ban kyntur pud ha ki jaka  ka JHADC ha Saitsama Thadmynri Kumba long mynta kine ki jaka ki la ktah bha ia ka Council khamtam ha Saitsama, kumta la kurup (Seize) noh ia ki maw  ba la tih bad ki dieng ba la pom.