Shah weng kam 43 ngut ki nongtrei KHADC ba thung khlem ‘Sanction Post’

U Chief Executive Member (CEM) ka Khasi Hills Autonomous District Council (KHADC) u Bah Shemborlang Rynjah hynne ka sngi ula ong, ba ka jingweng kam ki 13 ngut ki nongtrei ba dang shu thung thymmai bad ka jingpynhiar kyrdan ia ki 30 ngut ki nongtrei na ka ‘Permanent’ sha ka ‘Casual’ ka dei halor ka nongrim ba ka jingthungkam kam dei satia ka ‘Sanction Post’.

Haba iakren bad ki nongthoh khubor u CEM ka KHADC u Bah Shemborlang Rynjah ula ong, “Ka jingshim ia katei ka rai ka dei katkum ka kaiphod ba la ai da ka komiti thung kam da ka Executive Committee (EC) ban pynbeit ryntih ia ka rukom treikam ka Council bad kane ka komiti ka la shong jingialang haduh 5 sien ban peit bniah halor ka rukom thungkam ia ki 43 ngut ki nongtrei bad la shem ba na kine 13 ngut ki dei ba la shah thungkam thymmai bad 30 ngut ki dei ba la shah thungkam pura hadien ba ki la trei kum ki Casual”.U CEM ula ong, ba ki la shem ba ka jingthungkam ia kitei ka dei khlem ki ‘Sanction Post’ kumta ki la rai ban pynsangeh noh ia ka jingaikam ia ki 13 ngut bad ia kito ki nongtrei Casual ba la shah thung kum ki ‘Permanent’ la rai ban thung biang kum ki nongtrei ‘Casual’.

U Bah Shemborlang ula kren da kaba shai ba ym ban pynkylla ia ka rai bad un ieh beit ha ki nongtrei la ki dang kwah ne em ban trei ne ban ym trei shuh kum ki nongtrei ‘Casual’ bad ula bynrap ka EC kan dang iai bteng ban leh da kaba tyngeh pyrshah ia kano kano ka rukom thungkam khlem ka Sanction Post.Ula ong ba ki la rai ruh ban thung da ka Recruitment Committee ban pynthikna ban don ka jingkhuid halor ka jingthungkam hapoh ka Council.