Shaniah ka sorkar ban ioh bording 216 Megawatt na pung Umiam

U Myntri ka tnat Bording u AT Mondal hynne ka sngi ula iathuh ka tnat ka la peit pyrman bad shim ia ki sienjam ban pynthikna ia ka jingshngain jong ka Jingkieng Dam Umiam. Haba kren sha ki lad pathai khubor u Mondal ula ong, ka tnat Bording ka sngewkhia halor ka jinglong jingman jong ka Dam. U Mondal ula ong, ba hadien ba la maramot ia ka Jingkieng Dam, ka sngew shngain bad ka dei ruh namar ka jingsdang pyrkhing ia ka rung kaa mih ki kali heh. “Ngi la pyrkhing ia ka jingiaid ki kali heh ba khia haba buh hakhmat ia ka jingshngain jong ka Dam. Ngi la peit pyrman bha ia kane. Ki briew jong ngi ki la don hangthie bad ngi la buh ruh ia ki Pulit khnang ba ngin lah pynneh ia ka jingshngain jong ka Dam” la ong u Mondal.

Haba pynpaw ba ka rta jong ka Dam ka dei ka mat kaba sngewkhia, u Mondal u la ong “Mynta ka jingkylli ka long ba kaei ka ban jia hadien habud hadien ba la kut noh ka rta jong ka dam. Kane ka dei ka kam kaba eh bha namar ka Dam Umiam ka ai um sha ki 216 Megawatt jong ki saw unit ka Umiam bad ruh ka Umtru Power Project ba thymmai hajan Byrnihat. “Baroh ka um ka wan na ka pung Umiam. Ka dei ka kam kaba sngewkhia bha. Ngi la iakren ia kane hynrei ia mynta ngim pat shim ia kano kano ka rai. Ngi kyrmen ba kan sa don biang ka jingiakren bad jingiasyllok halor kaei ka ban long hynrei ka technology ka dei kaba kylla sted bha, kumta kin sa don ki technology kaba lah ban pynjlan ia ka rta jongka dam hynrei watla katta, ngi don ia ka jingsngewkhia” u la pynpaw.

Ha kajuh ka por, u Mondal u pyntip ba ka Sorkar ka la bynshet ha ka National Highways & Infrastructure Development Corporation Limited (NHIDCL) ba kan pynkhreh ia ka Detailed Project Report (DPR) na ka bynta ban shna ia kawei pat ka surok ban pyniaid kali.“Nga tharai ki kam ki la iaid bad ngin sa ioh ia ka surok bypass bad ka long kaba donkam bha ruh namar ka jingkieng ka dei kaba la tei bad plie naduh u snem 1965. Bad ha katei ka por, u pud ba la buh ia ki kali kit jingkit ka long kaba duna bha bad kumta la pynwandur ia ka jingkieng. Mynta ki kali kila kit khia bha ia ka jingkit bad ngi la donkam ia kawei pat ka jingkieng ka ban lad kyrda ia kane” ula bynrap.