Shem jingeh ban pynkhuid Wahumkrah bad Umshyrpi ba bun ki jingtei harud wah

U Member Secretary ka Meghalaya State Pollution Control Board (MSPCB) u Dr. GH. Chyrmang ula ong ba ka jingmih ki jingtei ha ki syndah ka Wahumkhrah bad Wahumshyrpi, ka la buh jingeh ban pyllong ia kine ki wah kiba khuid kumba long ha ki por mynshwa. Haba kren sha ki lad pathai khubor, u Dr Chyrmang ula ong ba ka wah Umkhrah bad wah Umsyrpi ki dei kiba la don lypa ha ka OA 673 ne ka Original Application (OA) naduh u snem 2018 jong ka National Green Tribunal (NGT) ha kaba la pynbynta ia kine ki wah kum kiba jaboh tam.

Ula ong ba ki don bun ki jingeh ban pynkhuid ia kine ki wah namar kiba bun ka jaboh kiba mih bad tuid ha kine ki wah ki dei ki jaboh ba tuid na iing kum ki jaboh ba mih na painkhana, ki jakhlia, ki pastik, ki kynja dawai ne chemical. Katkum ka jingong u Dr. Chyrmang, ka Board ka shu peit hynrei ka kamram ban pynkhuid ka dei jong ka tnad Urban hapoh ka jaka ka Municipal hynrei ka Urban ka la kyntait ba kam dei ka kamram jong ka bad kane ka dei ka jingeh.

“Ka jingeh ka long ka jingmih ki jingtei ha syndah ki wah, ka jingtuid ki jaboh ba khlem sangeh sha kine ki wah, kiba la pyllong ia kine ki wah ban jaboh khlem ju ioh kup ia ka dur ka dar kaba khuid kumba long ha ki por mynshwa,” ong u Dr Chyrmang. Ula ong ba ki don shibun eh ki jingeh hynrei la khmih lynti ba shisien ka sngi, kine ki wah kin sa long biang kiba khuid ba suba.